யாழ்ப்பாணத்தில் மாவீரர் வார நினைவேந்தல் தொடர்பிலான விசாரணைகள் தொடர்ந்து முன்னெடுக்கப்பட்டு வருகிறது.
மாவீரர் வார காலப்பகுதியில் கொக்குவில் சிவசுப்பிரமணியர் முருகன் கோவிலடியில் மாவீரர்களை நினைவேந்தும் நிகழ்வுகள் ஏற்பாடு செய்யப்பட்டிருந்தது.
அது தொடர்பில் நேற்று வெள்ளிக்கிழமை (06) இரு இளைஞர்களிடம் விசாரணைகள் நடத்தப்பட்டு, வாக்குமூலங்கள் பெறப்பட்டன.
மாவீரர் நாள் குறித்து முகநூலில் பதிவிட்டமை தொடர்பில் கடந்த 29ஆம் திகதி இணுவில் பகுதியை சேர்ந்த இளைஞன் பயங்கரவாத தடுப்பு பிரிவினரால் கைது செய்யப்பட்டு, விளக்கமறியலில் வைக்கப்பட்டிருந்த நிலையில் கடந்த புதன்கிழமை (4) பிணையில் செல்ல நீதிமன்றம் அனுமதித்தது.
அதேவேளை, வல்வெட்டித்துறை பகுதியில் தமிழீழத் தேசியத் தலைவரின் பிறந்த நாளைக் கொண்டாடியமை தொடர்பில் வட மாகாண சபையின் முன்னாள் உறுப்பினர் எம்.கே சிவாஜிலிங்கம் உள்ளிட்ட 06 பேரிடம் வல்வெட்டித்துறை காவல்துறையினர் விசாரணைகளை முன்னெடுத்து வாக்குமூலங்களைப் பெற்றுள்ளனர்.
அத்துடன் மாவீரர் நாள் மற்றும் தேசியத் தலைவரின் பிறந்தநாளுக்கு வாழ்த்து தெரிவித்து, முகநூலில் பதிவிட்ட யாழ்ப்பாணத்தைச் சேர்ந்த 06 இற்கு மேற்பட்ட இளைஞர்களிடம் விசாரணைகள் நடத்தப்பட்டு வாக்குமூலங்கள் பெறப்பட்டுள்ளமையும் குறிப்பிடத்தக்கது.
