யாழ். சுழிபுரம் விக்ரோறியா கல்லூரி மாணவன் விபத்தில் பலி; மற்றொரு மாணவன் படுகாயம்!

0
94

வேகக் கட்டுப்பாட்டை இழந்த உந்துருளி மின் கம்பத்துடன் மோதியதால் ஏற்பட்ட விபத்தில் சுழிபுரம் விக்ரோறியா கல்லூரி மாணவன் ஒருவர் உயிரிந்துள்ளார்.

இந்தச் சம்பவம் இன்று காலை யாழ்ப்பாணம், சுழிபுரம் சந்திப்பகுதியில் இடம்பெற்றது. சுழிபுரம் விக்ரோறியா கல்லூரியின் 2026 கணிதப் பிரிவில் கல்வி கற்கும் மாணவனான முருகசோதி சிறிபானுசன் (வயது17) என்பவரே உயிரிழந்துள்ளார். அவருடன் உந்துருளியில் பயணித்த மற்றொரு மாணவன் படுகாயமடைந்த நிலையில் யாழ்ப்பாணம் போதனா வைத்தியசாலையில் அனுமதிக்கப்பட்டுள்ளார்.

இந்தச் சம்பவம் குறித்து மேலும் தெரியவருவதாவது, சம்பவத்தில் உயிரிழந்த மாணவனும், படுகாயமடைந்தவரும் உந்துருளியில் மூளாய் நோக்கி பயணித்துள்ளார். சுழிபுரம் சந்தியில் வேகக்கட்டுப்பாட்டை இழந்த உந்துருளி மின்கம்பத்துடன் மோதி விபத்து ஏற்பட்டுள்ளது.

சம்பவத்தையடுத்து அங்கு கூடிய பொதுமக்கள் 1990 அவசர அம்புலன்ஸ் சேவைக்கு அழைப்பை ஏற்படுத்தியபோதிலும், நோயாளர் காவுவண்டி உரிய நேரத்துக்கு அங்கு வரவில்லை என்றும், மூளாய் கூட்டுறவு வைத்தியசாலையைத் தொடர்பு கொண்டு நோயாளர் காவுவண்டி அனுப்புமாறு கேட்ட போது அவர்கள் நேரங்கடத்தும் விதத்தில் பேசிக்கொண்டிருந்ததாகவும் அங்கு நின்றவர்கள் கூறினர்.

சம்பவம் பற்றிக் கேள்வியுற்ற விபத்துக்குள்ளான மாணவர்களின் உறவினர்களும், நண்பர்களும் சம்பவ இடத்துக்கு வந்த பின்னரே காயமடைந்த இருவரையும் பட்டா ரக வாகனமொன்றில் ஏற்றி அங்கிருந்து மூளாய் கூட்டுறவு வைத்தியசாலைக்குக் கொண்டு சென்றனர். எனினும் சிறிபானுசன் உயிரிழந்திருந்தார். மற்றைய மாணவன் மேலதிக சிகிச்சைக்காக யாழ்ப்பாணம் போதனா வைத்தியசாலைக்கு அனுப்பி வைக்கப்பட்டார்.

எமது கல்லூரி மாணவன் செல்வன் முருகசோதி ஸ்ரீ பானுஜன் (2026 கணிதப்பிரிவு) இன்று (2024.12.05 வியாழக்கிழமை) காலை அகால மரணம் அடைந்துள்ளார். அன்னாருக்கு விக்ரோறியாக் கல்லூரிச் சமூகத்தின் சார்பில் ஆழ்ந்த அனுதாபங்களைச் சமர்ப்பிக்கின்றோம்!
என விக்ரோறியாக் கல்லூரிச் சமூகம் விடுத்துள்ள செய்திக்குறிப்பில் தெரிவிக்கப்பட்டுள்ளது.

LEAVE A REPLY

Please enter your comment!
Please enter your name here