யாழ்ப்பாணம் ஐந்துசந்திப் பகுதியில் நேற்றிரவு 6.30 மணியளவில் இனந்தெரியாதோர் நடத்திய வாள் வீச்சு சம்பவத்தில் வயோதிபர் உட்பட நான்கு பேர் காய மடைந்துள்ளனர்.
எனினும் அவர்களில் எவரும் யாழ். போதனா வைத்தியசாலையில் சிகிச்சைக்காக அனுமதிக்கப்படவில்லை.
இச்சம்பவம் தொடர்பில் மேலும் தெரிய வருவதாவது, 8 பேர் கொண்ட இளைஞர் குழுவொன்று ஐந்துசந்திப் பகுதியில் உள்ள வெற்றிலைக் கடையின் முன்புறம் நின்றுகொண்டிருந்த இளைஞர் குழுவொன்றின் மீது சரமாரியாக வாள் வீச்சுத் தாக்குதலில் ஈடுபட்டது.
கடையில் இருந்த பொருட்கள் அனைத்தும் வெளியில் எறிந்து தீயிட்டுக் கொளுத்தியது டன் கடையில் இருந்த தளபாடங்கள் மற்றும் அலுமாரியை அடித்து நொறுக்கி அட்டகாசம் புரிந்துள்ளது.
மேலும் அப்பகுதியில் நின்று கொண்டிருந்த மோட்டார் சைக்கிள் ஒன்றும் இரண்டு சைக்கிள்களும் சேதமாக்கப்பட்டதுடன் சோடா போத்தல்களை வீதிகளில் வீசியும் தாக்குதல் மேற்கொண்டது.
அசம்பாவிதத்தையடுத்து அங்கு 50க்கும் மேற்பட்ட பொலிஸாரும் இராணுவத்தினரும் விரைந்துள்ளனர்.
அப்போது தாக்குதலில் ஈடுபட்டவர்களும் தாக்குதலுக்கு உள்ளானவர்களும் தப்பியோடி தலைமறைவாகியுள்ளனர். குறித்த பகுதி முழுவதும் மோதல் பகுதியானதுடன், வீதி முழுவதும் கண்ணாடி போத்தல் துண்டுகளால் நிரம்பி இருந்தது.
பொலிஸாரும் இராணுவத்தினரும் வீதித் தடைகளை ஏற்படுத்தி சோதனைகளில் ஈடுபட்ட துடன் விசாரணைகளை மேற்கொண்டனர். இச்சமயம் குறித்து பொலிஸார் தெரிவிக்கையில், குறித்த பகுதியில் தினமும் கூடும் இளைஞர் குழு, அப்பகுதியில் செல்லும் பெண்களை சேட்டை செய்வதாகவும் அதுதொடர்பாக நேற்று முன்தினம் ஓர் கைகலப்பு ஏற்பட்டதாகவும் அதன் தொடர்ச்சியாகவே இத்தாக்குதல் மேற் கொள்ளப்பட்டிருக்கலாம் எனவும் பொலிஸார் தெரிவித்துள்ளனர்.
