உந்துருளியைத் திருடி தப்பிச் சென்ற திருடர்கள் மோதி குடும்பஸ்தர் ஒருவர் உயிரிழந்துள்ளார்.
50 வயதான ராசா ரவிச்சந்திரன் என்பவரே இவ்வாறு உயிரிழந்துள்ளார்.
சுன்னாகம் சந்தியில் அமைக்கப்பட்டுள்ள வீதி சமிக்ஞை விளக்கு பகுதியில் நேற்று (24) திங்கட்கிழமை இரவு இடம்பெற்ற குறித்த விபத்து சம்பவம் தொடர்பில் மேலும் தெரியவருவதாவது,
சுன்னாகம் மதுபானசாலைக்கு முன்பாக நிறுத்தி வைக்கப்பட்டிருந்த உந்துருளியை தென்மராட்சியைச் சேர்ந்த இருவர் திருடி தப்பியோடுவதனை உந்துருளி உரிமையாளர் கண்டுள்ளார்.
அதனையடுத்து, உரிமையாளர் உள்ளிட்டோர் துரத்திச் சென்ற நிலையில் திருடர்கள் பயணித்த குறித்த உந்துருளி சுன்னாகம் சந்தி வீதி சமிக்ஞை விளக்கு பகுதியில் எதிரே வந்தவரை மோதித்தள்ளியது.
அதில் சம்பவ இடத்திலேயே அதிக குருதிப்போக்கு ஏற்பட்ட நிலையில் அவர் உயிரிழந்தார்.
விபத்தினை ஏற்படுத்திய இருவரும் பிடிக்கப்பட்டு சுன்னாகம் காவல்துறையினரிடம் ஒப்படைக்கப்பட்டனர்.
சம்பவம் தொடர்பில் சுன்னாகம் காவல்துறையினர் விசாரணைகளை மேற்கொண்டு வருகின்றனர்.
