2006 ஆம் ஆண்டு திருகோணமலையில் படுகொலை செய்யப்பட்ட ஊடகவியலாளர் சு.சுகிர்தராஜன் அவர்களின் 16 ஆவது ஆண்டு நினைவேந்தல் மட்டக்களப்பில் இன்று இடம்பெற்றது.
மட்டக்களப்பு ஊடக அமையம், மட்டக்களப்பு நகரின் காந்திப்பூங்காவுக்கு முன்னாலுள்ள படுகொலை செய்யப்பட்ட ஊடகவியலாளர்களின் ஞாபகார்த்த நினைவுத் தூபி ஆகிய இடங்களில் இந் நினைவேந்தல் இன்று (24) திங்கட்கிழமை இடம்பெற்றது.
இதன்போது படுகொலைசெய்யப்பட்ட ஊடகவியலாளர் சு.சுகிர்தராஜனின் திருஉருவப் படத்திற்கு மலர்மாலை அணிவிக்கப்பட்டு ஈகச்சுடர் ஏற்றப்பட்டு மலர்வணக்கம் செலுத்தப்பட்டதை தொடர்ந்து அகவணக்கம் செலுத்தப்பட்டது.
அதனைத் தொடர்ந்து கலந்துகொண்டவர்கள் படுகொலை செய்யப்பட்ட ஊடகவியலாளர்களுக்கு நீதி வேண்டி கவனயீர்ப்பு ஆர்ப்பாட்டத்தில் ஈடுபட்டனர்.
ஊடகவியலாளர்களுக்கு இழைக்கப்படும் அநீதிகளுக்கு எதிராக கோஷமெழுப்பியதுடன் பதாதைகளை ஏந்தி அமைதிவழிப் போராட்டம் நடத்தினர்.
இந் நிகழ்வானது மட்டு.ஊடக அமையம், மட்டக்களப்பு மாவட்ட தமிழ் ஊடகவியலாளர் ஒன்றியம், கிழக்கு ஊடகவியலாளர் ஒன்றியம்,வடக்கு கிழக்கு மற்றும் தெற்கு ஊடக அமைப்புக்களின் ஒத்துழைப்புடன் ஏற்பாடு செய்யப்பட்டது.
இதில் ஆர்வலர்கள்,ஊடகவியலாளர்கள், ஊடகவியலாளர் ஒன்றிய பிரதிநிதிகள், பொதுமக்கள் எனப் பலரும் கலந்துகொண்டனர்.
