முல்லைத்தீவு – இரணைப்பாலை பகுதியில் வீடொன்றுக்குள் நுழைந்த 8 பேர் கொண்ட கொள்ளை கும்பல் வீட்டிலிருந்தவர்கள் மீது தாக்குதல் நடத்திவிட்டு நகைகள் , பொருட்களை கொள்ளையடித்துச் சென்றுள்ளது . குறித்த சம்பவம் நேற்று இரவு இடம்பெற்றுள்ளதாக , இன்றைய தினம் முறைப்பாடு பதிவு செய்யப்பட்டிருக்கின்றது .
சம்பவம் தொடர்பாக மேலும் தெரியவருவதாவது , நேற்றைய தினம் இரவு சடுதியாக கதவை உடைத்து 4 பேர் வீட்டுக்குள் நுழைய அவர்களுக்கு பாதுகாப்பாக மேலும் 4 பேர் வீட்டிற்கு வெளியே நின்றுள்ளனர் . வீட்டுக்குள் நுழைந்தவர்கள் வீட்டிலிருந்த வயோதிப பெண் மீதும் , இளைஞன் மீதும் மூர்க்கத்தனமான தாக்குதல் நடத்தியிருக்கின்றனர் . பின்னர் வீட்டிலிருந்து தங்க நகைகள் மற்றும் 4 தொலைபேசிகளை கொள்ளையடித்துக் கொண்டு அங்கிருந்து தப்பிச் சென்றுள்ளனர் . சம்பவத்தில் காயமடைந்த வயோதிப பெண் புதுக்குடியிருப்பு வைத்தியசாலையில் அனுமதிக்கப்பட்டுள்ளார்.
இச்சம்பவம் தொடர்பில் காவல்துறையினர் விசாரணைகளை முன்னெடுத்துள்ளனர்.
தமிழர் தாயகப் பகுதிகளில் கொள்ளைச் சம்பவங்கள் அதிகரித்துவருகின்றது. இதுதொடர்பில் பொதுமக்கள் விழிப்புடன் செயற்படுமாறு அறிவுறுத்தப்பட்டுள்ளது.
