கொட்டாஞ்சேனை பொலிஸ் பிரிவுக்கு உட்பட்ட ஜம்பட்டா வீதியில் நேற்று பட்டப்பகலில் இடம்பெற்ற கொலை சம்பவத்துடன் தொடர்புடையவர்கள் என சந்தேகிக்கப்படும் இருவர் பொலிஸாரால் கைது செய்யப்பட்டுள்ளனர்.
குறித்த இருவரும் ஒரே குடும்பத்தைச் சேர்ந்த சகோதரர்கள் என பொலிஸார் தெரிவிக்கின்றனர்.
நேற்று பிற்பகல் 1.15 மணியளவில் ஜம்பட்டா வீதியில், கல்பொத்த வீதிக்கு திரும்பும் இடத்துக்கு அருகே உள்ள கடைக்கு முன்னால் 33 வயதுடைய ஜோன் பீட்டர் ரெக்ஸி றீகன் என்ற நபர் முச்சக்கர வண்டியில் வந்த நால்வரால் கூரிய வாள் மற்றும் கத்தி கொண்டு வெட்டிக்கொலை செய்யப்பட்டார்.
தனிப்பட்ட பகைக்கு பழிதீர்க்கும் முகமாக இந்த கொலை இடம்பெற்றுள்ளதாக ஆரம்ப கட்ட பொலிஸ் விசாரணைகளில் தெரியவந்திருந்தது.
இந் நிலையில் இந்த கொலையுடன் தொடர்புடைய சந்தேகநபர்கள் நால்வரில் இருவரை நேற்று மாலை 6.00 மணியளவில் கொட்டாஞ்சேனை பொலிஸார் கைது செய்தனர். 26, 21 வயதுடைய கொட்டாஞ்சேனை பிரதேசத்தை சேர்ந்தோரே இவ்வாறு கைது செய்யப்பட்டுள்ளனர்.
