வேலையிடத்தில் இருந்து கீழே விழுந்து இளைஞன் மரணம் !

திருகோணமலை – உப்புவெளி காவல்துறைப் பிரிவுக்குட்பட்ட கன்னியா கிளிகுஞ்சுமலைப் பகுதியில் இளைஞரொருவர் கீழே விழுந்து மரணித்தமை தொடர்பில் விசாரணைகளை ஆரம்பித்துள்ளதாக உப்புவெளி காவல்துறையினர் தெரிவித்துள்ளனர்.
கன்னியா கிளிக்குஞ்சுமலை பகுதியில் உள்ள கட்டிட பொருட்கள் விநியோகிக்கும் இடத்தில் மூவர் வேலை செய்து கொண்டிருந்த போது சக நண்பர் தள்ளியதில் விழுந்து உயிரிழந்துள்ளதாக காாவல்துறையினர் தெரிவித்தனர்.

இச்சம்பவம் நேற்று (30) இடம்பெற்றுள்ளது.

இவ்வாறு உயிரிழந்தவர் திருகோணமலை-கன்னியா புதுக்குடியிருப்பு – வரோதய நகர் பகுதியைச் சேர்ந்த சிவலிங்கம் அருண்குமார் (21 வயது) எனவும் காவல்துறையினர் தெரிவித்தனர்.

சம்பவம் குறித்துத் தெரியவருவதாவது,

மூவர் கட்டிட பொருட்கள் விநியோகிக்கும் இடத்தில் வேலை செய்து கொண்டிருந்த வேளை இருவருக்கிடையில் ஏற்பட்ட சண்டையில் ஒருவர் மற்ற நபரை தள்ளிவிட்டு விழுந்துள்ளதாகவும் இதனையடுத்து அவர் மயங்கிக் கிடந்த நிலையில் அவசர நோயாளர் காவுவண்டி மூலமாக திருகோணமலை பொது வைத்தியசாலைக்கு கொண்டு செல்லப்பட்ட போது உயிரிழந்துள்ளதாகவும் தெரிய வருகின்றது.

உயிரிழந்தவரின் சடலம் தற்பொழுது திருகோணமலை பொது வைத்தியசாலை பிரேத அறையில் வைக்கப்பட்டுள்ளதுடன், சந்தேகத்தின் பேரில் அவருடன் வேலை செய்து கொண்டிருந்த 17 வயது இளைஞரை காவல்துறையினர் கொண்டு சென்று விசாரணைகளை மேற்கொண்டு வருவதாகவும் உப்புவெளி காவல்துறையினர் தெரிவித்தனர்.