ஐக்கிய மக்கள் சுதந்திர முன்னணியை பலப்படுத்த மஹிந்த ராஜபக்ஷவின் ஆதரவு அவசியமானதே. ஆனால் மஹிந்தவை மாத்திரம் நம்பி களமிறங்கினால் தேர்தலில் வெற்றிபெறமுடியாது. ஜனாதிபதி மைத்திரிபால சிறிசேனவின் துணை அதற்கு அவசியம் என்று ஸ்ரீலங்கா சுதந்திரக் கட்சியின் ஊடகப் பேச்சாளர் திலங்க சுமதிபால தெரிவித்தார்.
ஸ்ரீலங்கா சுதந்திரக் கட்சியின் செய்தியாளர் சந்திப்பு நேற்று கட்சி தலைமைக் காரியாலயத்தில் நடைபெற்றது. இதில் கலந்துகொண்டு கருத்து தெரிவிக்கையிலேயே அவர் மேற்கண்டவாறு குறிப்பிட்டார்.
அவர் மேலும் கூறுகையில்,
முன்னாள் ஜனாதிபதி மஹிந்த ராஜபக் ஷ மற்றும் சந்திரிக்கா குமாரதுங்க ஆகியோர் ஸ்ரீலங்கா சுதந்திரக் கட்சிக்கு மிகவும் அவசியமான நபர்களேயாவர். ஆனால் அவர்களை மட்டும் நம்பி களம் இறங்கினால் கட்சியை வெற்றிப் பாதையில் கொண்டுசெல்ல முடியாது.
ஜனாதிபதி மைத்திரிபால சிறிசேனவின் துணை இல்லாது கட்சியை மீட்டெடுப்பது கடினமான விடயமாகும். அதேபோல் அனைத்து உறுப்பினர்களினதும் ஆதரவை பெற்ற ஒரு நபரையே பிரதமர் வேட்பாளராக்க வேண்டும். யாருடைய தனிப்பட்ட விருப்பத்தையும் கவனத்தில் கொண்டால் கட்சி சிதைவடையும் நிலைமை ஏற்பட்டுவிடும். இன்று கட்சிக்கு வெளியில் பலர் தமது தனிப்பட்ட கருத்துக்களை முன்வைத்து வருகின்றனர். வெளி இடங்களில் தனியாக செய்தியாளர் சந்திப்புகளை நடத்தி கருத்துக்களை முன்வைக்கின்றனர். ஆனால் இவை எதுவும் கட்சியின் சொந்தக் கருத்தாகாது.
கட்சிக்கு என்று மத்திய குழு உள்ளது. கட்சியின் மத்திய குழுவில் ஒரு விடயம் கலந்தாலோசிக்கப்பட்டு இறுதியாக பொதுவான முடிவு எடுக்கப்படும். அதையே அனைவரும் ஏற்றுக்கொள்ள வேண்டும் எனக் குறிப்பிட்டார்.
மஹிந்த அமரவீர..
இந்தச் செய்தியாளர் சந்திப்பில் கலந்துகொண்டிருந்த முன்னாள் அமைச்சர் மஹிந்த அமரவீர கருத்து தெரிவிக்கையில்,
ஐக்கிய மக்கள் சுதந்திர முன்னணியானது பலமானதும் யாராலும் பிளவுபடுத்த முடியாததுமான கட்சியாகும். ஒவ்வொரு கட்சியும் தேர்தலில் தோற்றவுடன் பிளவுபட்ட வரலாற்றை நாம் கண்டுள்ளோம். ஐக்கிய தேசியக் கட்சி கடந்த காலங்களில் எட்டு தடவைகள் பிளவுபட்டுள்ளது.
மக்கள் விடுதலை முன்னணி இரண்டு தடவைகள் பிளவுபட்டுள்ளது. ஸ்ரீலங்கா முஸ்லிம் காங்கிரஸ் , தமிழ் தேசியக் கூட்டமைப்பு ஆகிய கட்சிகள் கூட பிளவுகளை எதிர்கொண்டுள்ளன. ஆனால் ஸ்ரீலங்கா சுதந்திரக் கட்சிக்குள் அவ்வாறான பிளவுகள் இதுவரையில் ஏற்படவில்லை. இம்முறை நாம் ஜனாதிபதி மைத்திரிபால சிறிசேனவின் பிரச்சாரத்துக்கு எதிராகவே செயற்பட்டோம். முன்னாள் ஜனாதிபதி மஹிந்த ராஜபக் ஷவின் வெற்றியை பலப்படுத்தும் நோக்கத்தில் நாம் களமிறங்கினோம். ஆனால் நாம் தோல்வியை எதிர்கொண்டும் இன்று ஜனாதிபதி மைத்திரிபால சிறிசேனவின் கீழ் மீண்டும் கட்சியை ஒன்றிணைத்து பலமான கட்சியாக கூட்டு சேர்ந்துள்ளோம். கட்சியின் தலைமைப் பொறுப்பினை ஜனாதிபதி மைத்திரிபால சிறிசேன ஏற்றுக்கொண்டுள்ளார். ஆகவே தொடர்ந்து இந்தக் கட்சியை பலமான கட்சியாக இட்டுச் செல்வதே எமது நோக்கமாகும்.
மேலும் முன்னாள் ஜனாதிபதி மஹிந்த ராஜபக் ஷவை இரண்டு தடவைகள் நாம் ஜனாதிபதியாக்கியுள்ளோம். அதேபோல் முன்னாள் ஜனாதிபதி சந்திரிக்கா குமாரதுங்கவை இரண்டு தடவைகள் ஜனாதிபதியாக்கியுள்ளோம்.
அப்போதெல்லாம் கட்சியின் ஒன்றுமை மற்றும் நாட்டின் நன்மையை மட்டுமே கவனத்தில் கொண்டு தீர்மானம் எடுத்தோம். ஆனால் இம்முறை மைத்திரிபால சிறிசேனவுக்கு எமது ஆதரவு இருக்கவில்லை. அவருக்கு எதிராகவே நாம் செயற்பட்டோம். ஆனால் அவர் இன்று கட்சியை ஒன்றிணைத்து மீண்டும் ஒன்றாக முன்செல்ல தயாராக உள்ளார். ஆகவே அதை நாம் கவனத்தில் கொள்ள வேண்டும்.
தேர்தலின் பின்னர் நாம் ஜனாதிபதியுடன் கைகோர்த்து செயற்பட ஆரம்பித்து விட்டோம். இதில் முன்னைய தலைவர்களை இருவரையும் துணைக்கு அழைக்கின்றோம். இவர்களது துணை இல்லாது கட்சியை முன்னெடுத்து செல்ல முடியாது.
அதேபோல் ஜனாதிபதி மைத்திரிபால சிறிசேன மக்களின் ஆதரவை முழுமையாக பெற்றுள்ளார். அவரது துணை மிகவும் அவசியமானதாகும். அதை யாரும் நிராகரிக்க முடியாது. எனவே இம்முறை பொதுத் தேர்தலில் ஐக்கிய மக்கள் சுதந்திர முன்னணியின் சார்பில் பல இளம் உறுப்பினர்களுக்கு சந்தர்ப்பம் வளங்கப்படவுள்ளதாக கட்சி தீர்மானித்துள்ளது. அதேபோல் மிகவும் பலமானதொரு அணியினை தயார்படுத்தி தேர்தலில் களமிறக்க நாம் தயாராக உள்ளோம். இம்முறை தேர்தலில் எமக்கு மிகப்பெரிய வெற்றியை தக்கவைத்துக்கொள்ள முடியும்.
ஏனெனில் எம்முடன் பலமான பங்காளிக் கட்சிகள் கைகோர்த்துள்ளன. ஆனால் ஐக்கிய தேசியக் கட்சியின் அணியில் இருந்து தமிழ் தேசியக் கூட்டமைப்பு , மக்கள் விடுதலை முன்னணி, ஜனநாயகக் கட்சி ஆகிய முக்கிய கட்சிகள் தனித்து போட்டியிட தீர்மானித்துள்ளன. ஆகவே அவர்களது வாக்கு வங்கியில் பிளவுகள் ஏற்பட ஆரம்பித்துவிட்டது. எனவே நாம் மீண்டும் ஜனாதிபதி மைத்திரிபால சிறிசேன தலைமையில் பலமான அரசாங்கத்தை அமைப்போம் எனவும் குறிப்பிட்டார்.
