ஐந்து நாட்களாக வீதியில் நிற்கும் அப்பாவி மக்கள் யாரும் பொது சொத்துக்களை சேதமாக்கவில்லை . இராணுவத்திற்கு கல்லு வீசவில்லை . சிங்கள மக்களுக்கு எதிராக கோஷமிடவில்லை . இனவாதம் பேசவில்லை . மாறாக மிக எளிமையான நியாயமான கோரிக்கைகளையே அகிம்சை வழியில் மட்டுமே முன்வைக்கின்றார்கள்.
- இலங்கை இராணுவம் மற்றும் ஒட்டுக்குழுக்களால் கடத்தப்பட்டு காணாமலாக்கப்பட்ட அப்பாவி இளைஞர்கள் நடந்தது என்ன என கேட்கின்றார்கள்
- வடக்கு கிழக்கு அப்பாவி மக்களுக்கு சொந்தமான தனியார் நிலங்களை தொல்லியல் திணைக்களம் , மகாவலி அபிவிருத்தி சபை , வன வள திணைக்களம் , வன ஜீவராசிகள் திணைக்களம், என நீண்டு செல்லும் வகையற்ற மத்திய அரச நிறுவனங்கள் அபகரிப்பதை தடுத்து நிறுத்த கோருகின்றார்கள்
- நூற்றாண்டுகள் பழமை வாய்ந்த சைவ வழிபாட்டு இடங்களில் தொல்லியல் திணைக்களம் மூலம் பௌத்த மத சின்னங்களை , விகாரைகளை நிறுவி ஆக்கிரமிக்க வேண்டாம் என கேட்கின்றார்கள்
- வடக்கு கிழக்கு தமிழர் நிலங்களில் பௌத்த மயமாக்கல் , சிங்கள குடியேற்றங்கள் நிலவும் அடாவடியான அத்துமீறல்களை தடுத்து நிறுத்த கோருகின்றார்கள்
- மட்டக்களப்பு , முல்லைத்தீவு, கிளிநொச்சி என தொடர்ச்சியாக அபகரிக்கப்டும் மக்களின் வாழ்வாதாரமான மேச்சல் தரைகளை தங்களிடமே மீள ஒப்படைத்து விடும் படி கேட்கின்றார்கள்
- மனித குல நாகரீகத்திற்கு எதிராக படுகொலைகள் புரிந்தவர்கள் மன்னித்து விடுவிக்கப்படும் இலங்கையில் பல ஆண்டுகளாக எந்த குற்றமும் செய்யாமல் அரசியல் கைதிகள் என்கிற பெயரில் தடுத்து வைக்கப்பட்டு இருக்கும் அப்பாவி அரசியல் கைதிகள் விடுவிக்கப்பட வேண்டும் என கேட்கின்றார்கள்
- அப்பாவி தமிழர்களுக்கு எதிராக கட்டவிழ்த்து விடப்பட்டு இருக்கும் இனப்படுகொலை/ போர்க்குற்ற விசாரணைகளுக்கு சர்வதேச ரீதியாக நீதி கேட்கின்றார்கள்
- கோவிட் 19 தொற்று நோய் பரவலால் இறந்து போகும் அப்பாவி இஸ்லாமிய உடலங்களுக்கு தங்களது மத நம்பிக்கைளுக்கு இசைவாக இறுதி சடங்குகளை செய்வதற்கான அனுமதியை கேட்கின்றார்கள்
- மலையக தோட்ட தொழிலாளர்களுக்கு குறைந்த பட்ச நாள் ஊதியமாக 1000 ரூபாவை ஏற்பாடு செய்யுமாறு கேட்கின்றார்கள்
- தமிழ் மக்களின் நியாயமான அரசியல் கோரிக்கைகளான ” மரபுவழி தாயகம் , சுயநிர்ணய உரிமை , தமிழ்த்தேசியம்” என்பன அங்கீகரிக்கப்படவேண்டும் என கேட்கின்றார்கள்
பகிர்ந்தது.
