வவுனியா பிரதேசத்தில் இடம்பெற்ற நிதி மற்றும் தங்க ஆபரண கொள்ளைகள் பலவற்றுடன் தொடர்புள்ள பிரதான கொள்ளைக் கோஷ்டி ஒன்றினைச் சேர்ந்த மூவரை பொலிஸார் கைதுசெய்துள்ளனர். மாத்தறை, திக்வெல்ல பிரதேசத்தில் வைத்து, வவுனியா தீர்க்கப் படாத குற்றங்கள் தொடர்பிலான விசாரணைப் பிரிவினர் இவர்களைக் கைது செய்ததாக பொலிஸ் ஊடகப் பேச்சாளர் அலுவலகம் தெரிவித்தது. வவுனியாவில் இருந்து சென்ற குறித்த பொலிஸ் பிரிவின் சிறப்புக் குழுவினர் சந்தேகநபர்களின் மறைவிடத்தை கண்டுபிடித்து இவ்வாறு அவர்களைக் கைதுசெய்ததாக ஊடகப் பேச்சாளர் அலுவலகம் மேலும் குறிப்பிட்டது.
சந்தேக நபர்களைக் கைதுசெய்யும் போது அவர்களிடம் கைக்குண்டொன்றும் இருந்து மீட்கப்பட்டுள்ளதாகவும் அதனைவிட கொள்ளையிடப்பட்ட 8 பவுண் நகைகள் மற்றும் தொலைபேசி ஒன்றுடன் கொள்ளைக்கு பயன்படுத்தப்பட்ட மோட்டார் சைக்கிள் ஒன்றினையும் கைப்பற்றியுள்ளதாக பொலிஸார் குறிப்பிட்டனர்.
வவுனியா பிரதேசத்தை நீண்ட நாட்களாக அச்சுறுத்தி வந்துள்ள இந்தக் கொள்ளைக் கோஷ்டி தொடர்பில் பல்வேறு முறைப்பாடுகள் வவுனியா பொலிஸாருக்கு கிடைக்கப் பெற்றிருந்த நிலையிலேயே கைது செய்யப்படாது இருந்து வந்த நிலையில், அது தொடர்பில் விசாரணைகளை மேற்கொள் ளும் பொறுப்பு வவுனியா தீர்க்கப்படாத குற்ற விசாரணைப் பிரிவினருக்கு மாற்றப்பட்டது.
இந் நிலையிலேயே அது தொடர்பில் நீண்ட நாட்களாக மேற்கொள்ளப்பட்டு வந்த விசாரணைகளின் பலனாக இந்த கொள்ளைக் கோஷ்டி கைதுசெய்யப்பட்டுள்ளது.
கைதுசெய்யப்பட்ட மூன்று கொள்ளை சந்தேகநபர்களும் வவுனியா நீதிவான் முன் னிலையில் ஆஜர்படுத்தப்பட்டு எதிர்வரும் ஜூன் 3 ஆம் திகதி வரையில் விளக்கமறி யலில் வைக்கப்பட்டுள்ளனர்.
