மட்டக்களப்பில் உந்துருளி விபத்தில் குடும்பஸ்தர் பலி!

மட்டக்களப்பு மாவட்டத்தின் கொக்கட்டிச்சோலை காவல்துறைப் பிரிவுக்குட்பட்ட அம்பிளாந்துறையில் இன்று 14.11.2020 சனிக்கிழமை இடம்பெற்ற உந்துருளி விபத்தில் ஒருவர் உயிரிழந்துள்ளார்.
இந்த விபத்தில் மட்டக்களப்பு, மண்டூர் பலாச்சோலை,மயான வீதியைச் சேர்ந்த மூன்று பிள்ளைகளின் தந்தையான சு.பரணிதரன் (37 வயது) என்பவர் உயிரிழந்துள்ளார்.
இன்று காலை தீபாவளி தினத்தில்  வயலுக்கு சென்றுகொண்டிருக்கும்போதே இந்த விபத்து இடம்பெற்றுள்ளது.

அம்பிளாந்துறை-வெல்லாவெளி வீதியில் தாமரைப்பூசந்திக்கு அருகில் இந்த விபத்து இடம்பெற்றுள்ளது.
உந்துருளியில் வேகமாக சென்றபோது வேகத்தினை கட்டுப்படுத்தமுடியாமல் மின்சார தூணில் மோதி இந்த விபத்து இடம்பெற்றுள்ளது. இதன்போது குறித்த நபர் சம்பவ இடத்திலேயே உயிரிழந்துள்ளார்.
இதேநேரம் குறித்த நபருடன் மற்றுமொருவர் பயணித்துள்ளதாகவும் விபத்து நடைபெற்ற நிலையில் குறித்த நபர் காணாமல்போயுள்ளதாகவும் அப்பகுதி மக்கள் தெரிவிக்கின்றனர்.
உயிரிழந்தவரின் சடலம் மீட்கப்பட்டு பிரேத பரிசோதனைகளுக்காக மட்டக்களப்பு போதனா வைத்தியசாலைக்கு கொண்டுசெல்லப்பட்டுள்ளது.
இது தொடர்பான விசாரணைகளை கொக்கட்டிச்சோலை காவல்துறையினர் முன்னெடுத்துவருகின்றனர்.