குடும்பங்களுக்கு இடையிலான முரண்பாடு கைலப்பாக மறியதில் இருவர் படுகொலை செய்யப்பட்டுள்ளனர்.
சுழிபுரம் மத்தி, குடாக்கனை பகுதியில் நேற்று (13) வெள்ளிக்கிழமை பின்னிரவு இந்தச் சம்பவம் இடம்பெற்றுள்ளது.
சம்பவ இடத்தில் ஒருவர் உயிரிழந்ததுடன் மற்றைய ஒருவர் யாழ்ப்பாணம் போதனா வைத்தியசாலைக்கு அழைத்துச் செல்லப்படும் போது உயிரிழந்துள்ளார்.
அதே இடத்தைச் சேர்ந்த சின்னவன் செல்வம் (வயது-56) மற்றும் இராசன் தேவராசா (வயது-31) என்ற இருவருமே இவ்வாறு கொல்லப்பட்டனர்.
அங்கு மாலையிலிருந்து முறுகல் நிலை காணப்பட்டுள்ளது. அது தொடர்பில் வட்டுக்கோட்டை காவல்துறையினருக்கும் அறிவிக்கப்பட்டது. எனினும் காவல்துறையினர் சம்பவ இடத்துக்கு வரவில்லை என்று அந்தப் பகுதியைச் சேர்ந்தோர் தெரிவித்தனர்.
அதனால் ஒரு பகுதியினர் வாள்களுடன் மற்றைய பகுதியினரின் வீட்டுக்குள் பின்னிரவில் புகுந்து சரமாரியாகத் தாக்குதல் நடத்தியுள்ளனர். அதனால் இருவர் கொல்லப்பட்டுள்ளனர்.
சம்பவத்தையடுத்து அந்தப் பகுதியில் உறவினர்களுக்கு இடையே மோதல் உருவாகும் பதற்ற நிலை ஏற்பட்டிருந்தது எனத் தெரிவிக்கப்பட்டுள்ளது. சம்பவ இடத்தில் வட்டுக்கோட்டை காவல்துறையினர் விசாரணைகளை முன்னெடுத்துள்ளனர்.
இதேவேளை, குறித்த இரட்டைக் கொலை தொடர்பில் ஒரே குடும்பத்தைச் சேர்ந்த மூவர் கைது செய்யப்பட்டு எமது காவலிலுள்ளனர். எனினும் பிரதான சந்தேக நபர் உள்ளிட்ட இருவர் தலைமறைவாகியுள்ளனர் என்று வட்டுக்கோட்டை காவல்துறையினர் தெரிவித்துள்ளனர்.
