மட்டக்களப்பில் பள்ளி மாணவர்களிடையேயான மோதல் வீடுவரை சென்றதில் ஏற்பட்ட வாய்த்தர்க்கம் வாள்வெட்டில் முடிந்ததில் 14 வயதுப் பள்ளி மாணவன் சம்பவ இடத்திலேயே துடிதுடித்து இறந்துள்ளார். மாணவனின் உறவினர்கள் இருவர் படுகாயமடைந்துள்ளனர்.
மட்டக்களப்பு செங்கலடி பாடசாலையொன்றில் பத்தாம் ஆண்டில் கல்வி கற்கும், செங்கலடியைச் சேர்ந்த மாணவனுக்கு, அதே பாடசாலையில் கற்கும் கொம்மாதுறையை சேர்ந்த மாணவன் தாக்கியதால் காயமடைந்த நிலையில் செங்கலடியைச் சேர்ந்த மாணவன், வீடு சென்று நடந்த விடயத்தைக் கூறியதும்,
காயமடைந்த மாணவனின் உறவினர்கள் இருவர் இம் மாணவனை அழைத்துக் கொண்டு நேற்று இரவு 08.30 மணியளவில் கொம்மாதுறைக்கு சென்று, ஏன்? இவனை தாக்கினீர்கள் என விடயத்தை கேட்டுக்கொண்டிருந்த போது ஏற்ட்ட கருத்துமுரன்பாட்டினால் கொம்மாதுறையை சேர்ந்த சம்பந்தப்பட்டவர்களால், இவர்கள் தாக்கப்பட்டு, வாள் வெட்டுக்குள்ளாகியுள்ளனர்.
இச்சம்பவத்தில் பாரிய வாள் வெட்டுக்குள்ளான செங்கலடியை சேர்ந்த மாணவன் ரமணன் திவ்வியநாதன் (வயது 14) சம்பவ இடத்திலேயே மரணமடைந்ததோடு, இம் மாணவனின் உறவினர்களான சசிகுமார் மற்றும் பிரேமநாதன் ஆகிய இருவரும் பாரிய வெட்டுக்காயங்களுக்குள்ளாகியுள்ளனர்.
சம்பவத்தை அறிந்த ஏறாவூர் குற்றத்தடுப்பு காவல்துறையினர் சம்பவ இடத்துக்கு நேரடியாக சென்று விசாரணைகளை மேற்கொண்டு, மாணவனின் சடலத்தை ஏறாவூர் ஆதார வைத்தியசாலையிலும், காயங்களுக்குள்ளானவர்களை மட்டக்களப்பு போதனா வைத்தியசாலையிலும் அனுமதித்திருக்கிறார்கள்.
கொலைக்கு காரணமானவர்கள் தப்பிச்சென்றுள்ள போதும், கொலைக்கு பயன்படுத்தப்பட்ட நவீன ரக வாள், ஏறாவூர் காவல்துறையினரால் கண்டெடுக்கப்பட்டிருக்கிறது.
மேலதிக விசாரணைகளை ஏறாவூர் குற்றத்தடுப்பு காவல்துறையினர் மேற்கொண்டு வருகின்றனர்.
