உலக நாடுகள் முழுவதையும் உலுக்கி எடுத்துவரும் கொரோனா வைரஸ் தாக்கத்தால் உயிரிழந்தவர்களின் எண்ணிக்கை 26 ஆயிரத்து 518 ஆக உயர்ந்துள்ளது.
சீனாவின் ஹூபேய் மாகாணம் வுஹான் நகரில் கடந்த டிசம்பர் மாதம் கண்டுபிடிக்கப்பட்ட கொரோனா வைரஸ் தற்போது உலகின் 198 நாடுகளில் பரவியுள்ளது. இந்த வைரஸ் தாக்குதலின் வீரியம் நாளுக்கு நாள் அதிகரித்துக்கொண்டே செல்கின்றது.
உலகம் முழுவதும் இதுவரை 5 இலட்சத்து 79 ஆயிரத்து 892 பேருக்கு கொரோனா வைரஸ் பரவியுள்ளது. இவர்களில் இதுவரை 26 ஆயிரத்து 518 பேர் உயிரிழந்துள்ளனர்.
மேலும், 4 இலட்சத்து 22 ஆயிரத்து 698 பேர் சிகிச்சை பெற்று வருகின்றனர். வைரஸ் பாதிக்கப்பட்டவர்களில் இதுவரை ஒரு இலட்சத்து 30 ஆயிரத்து 676 பேர் குணமடைந்துள்ளனர்.
👉 இத்தாலி
இந்நிலையில், ஐரோப்பிய நாடான இத்தாலியில் இந்த வைரஸ் கோரத்தாண்டவம் ஆடி வருகின்றது. அந்நாட்டில் நேற்று ஒரே நாளில் மட்டும் 919 பேர் உயிரிழந்துள்ளனர். இதனால் அந்நாட்டில் கொரோனாவுக்கு உயிரிழந்தோர் எண்ணிக்கை 9 ஆயிரத்து 134 ஆக அதிகரித்துள்ளது.
இத்தாலியைத் தொடர்ந்து பல நாடுகளில் நேற்று நூற்றுக்கணக்கானவர்கள் கொரோனாவுக்கு உயிரிழந்துள்ளனர்.
👉 ஸ்பெயின்
ஸ்பெயின் நாட்டில் 64 ஆயிரத்து 59 பேருக்கு வைரஸ் பரவியுள்ளது. அந்நாட்டில் நேற்று ஒரே நாளில் மட்டும் வைரஸுக்கு 569 பேர் உயிரிழந்தனர். இதனால் அங்கு பலியானோர் எண்ணிக்கை 4 ஆயிரத்து 934 ஆக உயர்ந்துள்ளது.
👉 பிரான்ஸ்
பிரான்ஸ் நாட்டிலும் 32 ஆயிரத்து 964 பேருக்கு வைரஸ் பரவியுள்ளது. நேற்று ஒரே நாளில் மட்டும் அந்நாட்டில் வைரஸுக்கு 299 பேர் பலியாகினர். இதனால் உயிரிழந்தோர் எண்ணிக்கை ஆயிரத்து 995 ஆக அதிகரித்துள்ளது.
👉 பிரிட்டன்
பிரிட்டனில் 14 ஆயிரத்து 543 பேருக்கு கொரோனா பரவியுள்ளது. அவர்களில் நேற்று ஒரே நாளில் மட்டும் 181 பேர் உயிரிழந்தனர். அந்நாட்டில் இதுவரை பலியானோர் எண்ணிக்கை 759 ஆக உயர்ந்துள்ளது.
👉 அமெரிக்கா
அமெரிக்காவில் தற்போது வேகமாகப் பரவி வரும் கொரோனாவுக்கு 96 ஆயிரத்து 968 பேர் பாதிக்கப்பட்டுள்ளனர். அந்நாட்டில் நேற்று ஒரே நாளில் 182 பேர் பலியாகினர். இதனால் அந்நாட்டில் வைரஸ் தாக்குதலுக்கு உயிரிழந்தோர் எண்ணிக்கை ஆயிரத்து 477 ஆக அதிகரித்துள்ளது.
(நன்றி:அரியகுமார் யசீகரன்)
