வவுனியா முருகனூர் பகுதியில் இன்று (14.02.2020) காலை 10.10 மணியளவில் இடம்பெற்ற முச்சக்கரவண்டி விபத்தில் கணவர் படுகாயமடைந்ததுடன் மனைவி மரணமடைந்துள்ளார்.
விபத்து தொடர்பாக தெரியவருகையில்,
முருகனூர் பகுதியிலிருந்து சிதம்பரபுரம் நோக்கி முச்சக்கரவண்டியில் கணவன் (சாரதி) மற்றும் மனைவி பயணித்துக்கொண்டிருந்த சமயத்தில் முச்சக்கரவண்டியில் ஏற்பட்ட கோளாறு காரணமாக முருகனூர் பகுதியில் முச்சக்கரவண்டி தடம்புரண்டு விபத்துக்குள்ளாகியுள்ளதாக பொலிஸாரின் ஆரம்ப கட்ட விசாரணைகளிலிருந்து தெரியவருகின்றது.
இந்த விபத்தில் மனைவி உயிரிழந்ததுடன் கணவன் படுகாயமடைந்த நிலையில் நோயாளர் காவு வண்டி மூலம் வவுனியா வைத்தியசாலைக்கு கொண்டு செல்லப்பட்டார்.
படுகாயமடைந்த 30வயதுடைய கோவிந்தராசா கலைச்செல்வன் (கணவர்) திடீர் விபத்துப்பிரிவில் அனுமதிக்கப்பட்டதுடன் உயிரிழந்த 25வயதுடைய கலைச்செல்வன் தர்சினி (மனைவி) யின் சடலம் பிரேத பரிசோதனைகளுக்கு வைத்தியசாலை பிரதே அறையில் வைக்கப்பட்டுள்ளது.
சம்பவ இடத்திற்கு விரைந்த போக்குவரத்து பொலிஸார் மேலதிக விசாரணைகளை முன்னெடுத்து வருகின்றனர்.
