காணாமல் போயுள்ள கிழக்கு பல்கலைக்கழக மருத்துவபீடத்தின் மாணவனைத் தேடும் பணிகள் தீவிரமாக மேற்கொள்ளப்பட்டு வருவதாக மட்டக்களப்பு பொலிஸார் தெரிவித்துள்ளனர்.
கிழக்கு பல்கலைக்கழகத்தின், மட்டக்களப்பு மருத்துவபீடத்தின“ முதலாமாண்டு மாணவனான தலவாக்கலை, லிந்துலை பகுதியை சேர்ந்த சி.மோகன்ராஜ் என்னும் மாணவன் கடந்த 10ம் திகதி முதல் காணாமல்போயுள்ளதாக மட்டக்களப்பு பொலிஸ் நிலையத்தில் முறையிடப்பட்டுள்ளது.
சம்பவ தினத்தில் பிள்ளையாரடியில் உள்ள வளாக விடுதியில் இருந்து வெளியில் சென்றவர் மாலை வரையில் விடுதிக்கு திரும்பவில்லை. இதையடுத்து, நேற்று முன்தினம் சக மாணவர்களினால் மட்டக்களப்பு பொலிஸ் நிலையத்தில் முறைப்பாடு செய்யப்பட்டுள்ளது.
இதையடுத்து, மட்டக்களப்பு பொலிஸார் விசாரணைகளை ஆரம்பித்துள்ளனர். மாணவனின் கையடக்கத் தொலைபேசியை அடிப்படையாக கொண்டு மேற்கொள்ளப்பட்ட விசாரணையில், கல்லடி பாலத்திற்கு அருகில் இறுதியாக கையடக்க தொலைபேசி இயங்கியது தெரிய வந்தது. இதையடுத்து கல்லடி பாலப் பகுதியில் கடற்படை மற்றும் பொலிஸார் தேடுதல்களை மேற்கொண்டனர்.
தேடுதல்கள் தொடர்ந்த வண்ணமுள்ளன.
