வீடொன்றினுள் வாள்களுடன் புகுந்து தாக்குதல் நடத்த முயற்சித்த இளைஞர்கள் மூவரை அப்பகுதி மக்கள் மடக்கிப்பிடித்துள்ளனர்.
இந்தச் சம்பவம் இன்று காலை வவுனியா மதவுவைத்தகுளம் பகுதியில் நடந்துள்ளதாகத் தெரிவிக்கப்படுகிறது.
குறித்த வீட்டிலிலுள்ள ஒருவருக்கும் தாக்குதல் நடத்த முயற்சித்த இளைஞர்களுக்குமிடையே இன்று காலை வீதியில் வாய்த்தர்க்கம் இடம்பெற்றுள்ளது. அதன் பின்னர் இருவரும் அவ்விடத்திலிருந்து அகன்று சென்றுள்ளனர்.
பின்னர் அங்கு முச்சக்கரவண்டியில் வாள்களுடன் சென்ற மூன்று இளைஞர்கள், வீட்டாரை வெளியே வரவழைத்து தாக்குதல் நடத்த முயற்சித்துள்ளனர். எனினும் தாக்குதல் சம்பவம் அயலவர்களினால் முறியடிக்கப்பட்டுள்ளது.
தாக்குதல் நடத்த முயற்சித்த மூன்று இளைஞர்களை அயலவர்கள் மற்றும் கிராம இளைஞர்கள் இணைந்து மடக்கிப்பிடித்து வீட்டுக்குள் அடைத்து வைத்து பொலிஸாருக்கு தகவல் வழங்கியுள்ளனர்.
மூன்று மணிநேரம் கடந்தும் சம்பவ இடத்திற்கு பொலிஸார் வராத நிலையில் கிராம பொது அமைப்புக்கள் இரு தரப்பினருடனும் கலந்துரையாடி இணக்கத்திற்கு வந்து இளைஞர்கள் கொண்டு வந்த வாளை பொது அமைப்புக்கள் தம்வசப்படுத்தியதாகக் கூறப்படுகிறது.
இனிமேல் எவ்வாறான சட்டவிரோத செயல்களில் ஈடுபடமாட்டோம் என கிராம பொது அமைப்புக்கள் மற்றும் அயலவர்கள் முன்னிலையில் குறித்த மூன்று இளைஞர்களும் தெரிவித்ததையடுத்து அவர்கள் பொதுமக்களால் விடுவிக்கப்பட்டனர்.
