15 இந்திய மாலுமிகள் உட்பட பலர் பயணித்த இரண்டு கப்பல்கள் ரஷ்யா-உக்ரைன் கடல் பகுதியில் சென்றுகொண்டிருந்தபோது தீ விபத்து ஏற்பட்டதில் 14 பேர் உயிரிழந்துள்ளனர்.
தான்சானியாவை சேர்ந்த கேன்டி மற்றும் மேஸ்ட்ரோ ஆகிய இரண்டு கப்பல்கள். ரஷ்யா-உக்ரைன் கடல் பகுதியில் கெர்ச் ஜலசந்தியில் சென்றுகொண்டிருந்தன. ஒரு கப்பல் சமையல் எரிவாயுவையும் மற்றொரு கப்பல் எண்ணெய்யையும் ஏற்றிச்சென்றன.
இவற்றில் ஒரு கப்பலில் எரிபொருளை மாற்றும்போது தீ பற்றியது. இதனால் அந்தக் கப்பலில் இருந்த பொருட்கள் வெடித்து சிதறின. மாலுமிகள் சிலர் கப்பலில் இருந்து கடலுக்குள் குதித்து உயிர் தப்பினர். சிலர் தீ விபத்தில் சிக்கி உயிரிழந்தனர். அவர்களை மீட்கும் பணியில் ரஷ்ய கடற்படை ஈடுபட்டுள்ளது.
இந்த விபத்தில் 14 பேர் உயிரிழந்துள்ளனர் என தகவல்கள் தெரிவிக்கின்றன. 12 பேரை கடலில் இருந்து மீட்டுள்ளதாகவும் சிலரைக் காணவில்லை எனவும் ரஷ்ய கடற்படை தெரிவித்துள்ளது.
கேன்டி, கப்பலில் 17 பணியாளர்கள் பயணித்துள்ளனர். இதில் 9 பேர் துருக்கியை சேர்ந்தவர்கள். 8 பேர் இந்தியர்கள். மேஸ்ட்ரோ கப்பலில் மொத்தம் 15 பேர் இருந்துள்ளனர். துருக்கிஇ இந்தியாவை சேர்ந்தவர்கள் தலா ஏழு பேரும் லிபியாவை சேர்ந்த ஒருவரும் இருந்துள்ளனர். மீட்பு பணிகள் தொடர்ந்து நடக்கின்றன.
