உலகம் முழுவதும் கிறிஸ்துமஸ் பண்டிகை கொண்டாட்டங்கள் களைக்கட்டத் தொடங்கியுள்ளன. அமெரிக்காவில் வெகு விமரிசையாக கொண்டாடப்படும் பண்டிகைகளில் கிறிஸ்துமஸ் முக்கியமான பண்டிகையாக கருதப்படுகிறது. இந்நிலையில், அமெரிக்காவில் உள்ள சில்ட்ரன்ஸ் நேஷனல் எனும் அமைப்பு புற்றுநோயால் பாதிக்கப்பட்ட குழந்தைகளுக்காக பிரத்யேகமான கிறிஸ்துமஸ் விழாவை ஏற்பாடு செய்திருந்தது.
கிறிஸ்துமஸ் கொண்டாட்டம் என்றாலே கிறிஸ்துமஸ் தாத்தாவும், டேஸ்டியான கேக்குகளும் தான் நினைவிற்கு வரும். அந்த வகையில், சில்ட்ரன்ஸ் நேஷனல் அமைப்பு நடத்திய கிறிஸ்துமஸ் கொண்டாட்டத்தில் அமெரிக்க முன்னாள் அதிபர் பாரக் ஒபாமா, கிறிஸ்துமஸ் தாத்தாவை போல் வேடமிட்டு புற்றுநோய் பாதித்த குழந்தைகளுக்கு விதவிதமான பரிசுகளை வழங்கி மகிழ்வித்தார்.
ஒரு நல்ல காரியத்திற்காக கிறிஸ்துமஸ் தாத்தாவாக மாறிய அமெரிக்கா முன்னாள் அதிபர் ஒபாமாவுக்கு பல்வேறு தரப்பிலிருந்து பாராட்டுக்கள் குவிந்து வருகின்றன.
