கண்ணாடிப் பாளங்கள் சரிந்து விழுந்ததில் கழுத்து வெட்டப்பட்டு 28 வயது நிரம்பிய இளைஞர் ஒருவர் பரிதாபமாக மரணமடைந்துள்ளார்.
கண்டி, மஹிய்யாவைப் பகுதியில் கண்ணாடிப் பாளங்கள் (சீட் கிளாஸ்) விற்பனை செய்யும் நிறுவன களஞ்சிய அறையில் இச்சம்பவம் இடம்பெற்றுள்ளது. சுமார் 120 கிலோ எடைகொண்ட சீட் கண்ணாடிப் பாளங்களே இவ்வாறு மேற்படி இளைஞர்மீது விழுந்துள்ளன. இவர் கண்ணாடிப் பாளங்களை கையாள்கையில் இவ்விபத்து ஏற்பட்டிருக்கலாம் எனச் சந்தேகிக்கப்படுகிறது. சம்பவம் நடக்கும் போது நேரில் யாரும் காணவில்லை எனவும் தெரிவிக்கப்படுகிறது.
பின்னர் ஸ்தலத்திற்கு கண்டி மாநகர சபையின் தீயணைக்கும் பிரிவினர் உடனடியாக அழைக்கப்பட்டு காயமடைந்தவரை வைத்தியசாலைக்கு எடுத்துச்செல்ல எடுக்கப்பட்ட முயற்சி தோல்வியில் முடிந்துள்ளது.
அதேநேரம் கண்ணாடி களஞ்சிய உரிமையாளர் ஸ்தலத்திற்கு வந்தபோது சம்பவத்தை நேரில் கண்டதினால் ஏற்பட்ட அதிர்ச்சியில் இருதயப் பாதிப்பிற்குள்ளாகி கண்டி வைத்தியசாலையில் அனுமதிக்கப்பட்டு சிகிச்சை பெற்று வருகிறார். கண்டி பொலி ஸார் விசாரணைகளை மேற்கொண்டுள்ளனர்.
