காங்கேசன்துறையில் இருந்து கொழும்பு நோக்கி இன்று நண்பகல் பயணித்த தொடருந்து கந்தர்மடம் இந்து மகளிர் வீதியில் பாதுகாப்பற்ற தொடருந்து கடவையில் கடக்க முற்பட்ட சிற்றுந்தை மோதியதில் சிற்றுந்தில் பயணித்த யாழ்ப்பாணத்தை சேர்ந்த வர்த்தகர் ஒருவர் படுகாயமடைந்துள்ளார்.
இன்று நண்பகல் கந்தர் மடம் இந்து மகளிர் வீதியில் சிற்றுந்தில் பயணித்த வர்த்தகர், பாதுகாப்பற்ற தொடருந்து கடவையை கடக்க முற்பட்டுள்ளார்.
அப்போது எதிரே வந்த தொடருந்து, சிற்றுந்தை மோதி கந்தர் மடம் அரசடி வீதிவரை இழுத்துச்சென்றுள்ளது.
இந்த சம்பவத்தில் சிற்றுந்து முற்றுமுழுதாக சேதமடைந்ததுடன் சிற்றுந்தில் பயணித்த யாழ் வர்த்தகரான பாலா என்பவர் தலையில் படுகாயமடைந்த நிலையில் யாழ் போதனா வைத்திய சாலையில் அனுமதிக்கப்பட்டுள்ளார்.
விபத்து தொடர்பாக காவல்துறையினர் விசாரணைகளை மேற்கொண்டுள்ளனர்.
