உலகக் கிண்ண கால்பந்துப் போட்டியில் பிரான்ஸ் அணி வெற்றிபெற்றதைப் பாரிஸில் கொண்டாடிய ரசிகர்கள் வரம்பு மீறியதால் கண்ணீர்ப்புகைக் குண்டுகளை வீசி அவர்களை பொலிஸார் கட்டுப்படுத்தியுள்ளனர்.
பாரிஸ் நகர வீதிகளில் பத்தாயிரத்துக்கு மேற்பட்ட ரசிகர்கள் கொண்டாட்டத்தில் ஈடுபட்டனர். வாணவேடிக்கை, ஆடல் பாடல் எனக் கொண்டாட்டம் களைகட்டிய நேரத்தில் ஒருசிலர் கொண்டாட்டத்தைக் குலைக்கும் வகையில் கடைகளில் உள்ள கண்ணாடிகளைக் கல்வீசி உடைத்தனர். இதையடுத்துக் பொலிஸார் கண்ணீர்ப்புகைக் குண்டுகளை வீசி அவர்களைக் கட்டுப்படுத்தினர்.
இன்னும் சில இடங்களில் கடைகள் சூறையாடப்பட்டன. அசம்பாவிதங்களைத் தவிர்க்கும் நோக்கில் கலகத் தடுப்புக் பொலிஸார் நூற்றுக் கணக்கானோர் பணியில் ஈடுபடுத்தப்பட்டிருந்தபோதும் பலனளிக்கவில்லை.
சிலர் பாதுகாப்புப் படையினர் மீது நெருப்பைக் கொளுத்திப் போட்டனர்.
ஒருபுறம் வன்முறை நடந்தாலும், நாடு திரும்பும் வெற்றி வீரர்களை வரவேற்பதற்காக நாடே விழாக்கோலம் பூண்டுள்ளது.
பாஸ்டில் சிறைத் தகர்ப்பு நாள், உலகக் கிண்ண கால்பந்து வெற்றிக்கொண்டாட்டம் ஆகியவற்றுக்காகப் பாரிஸில் ஒரு இலட்சத்துக்கு மேற்பட்ட பாதுகாப்ப படையினர் பணியில் ஈடுபடுத்தப்பட்டிருந்தனர்.
உலகக்கிண்ண கால்பந்தாட்டத்தொடரில் சம்பியனான பிரெஞ்ச் அணி வீரர்கள் தமது சொந்த நாட்டை சென்றடைந்தனர்.
இதனிடையே, உலகக்கிண்ண கால்பந்தாட்ட வரலாற்றில் முதல்தடவையாக இறுதிப்போட்டிக்கு முன்னேறி, 2ஆம் இடத்தைப் பிடித்த குரோஷிய அணி வீரர்களுக்கு அந்நாட்டில் உற்சாக வரவேற்பு அளிக்கப்பட்டது.
ரஷ்யா முன்னின்று நடத்திய 21 ஆவது உலகக்கிண்ண கால்பந்தாட்டத் தொடரில் 4 – 2 என்ற கோல் கணக்கில் குரோஷியாவை வீழ்த்தி பிரெஞ்ச் அணி சம்பியனானது.
பிரெஞ்ச் அணி உலகக்கிண்ணத்தை வெற்றிகொண்ட 2ஆவது சந்தர்ப்பமாக இது பதிவானது.
உலக சம்பியனாக முடிசூடிய பிரான்ஸ் வீரர்கள் நேற்று தமது சொந்த நாட்டை சென்றடைந்ததோடு, அங்கு அவர்களுக்கு உற்சாக வரவேற்பு அளிக்கப்பட்டுள்ளது.
20 வருடங்களின் பின்னர் உலகக்கிண்ணத்தை வெற்றிகொண்ட பிரான்ஸ் வீரர்களை வாழ்த்துவதற்காக அந்நாட்டு ஜனாதிபதி இமானுவேல் மெக்ரோன் உள்ளிட்ட பிரமுகர்கள் பங்கேற்றுள்ளனர்.
பிரான்ஸ் அணி வீரர்களை வாழ்த்துவதற்காக மில்லியன் கணக்கான மக்கள் பாரிஸ் நகரில் ஒன்றுகூடியதாக சர்வதேச ஊடகங்கள் செய்தி வெளியிட்டுள்ளன.
கால்பந்தாட்ட சாம்ராஜ்ஜியத்தில் 2ஆவது தடவையாகவும் அரியாசனத்தில் அமர்ந்துள்ள பிரெஞ்ச் அணியினர் அந்நாட்டின் உயரிய Légion d’Honneur விருது வழங்கி கெளரவிக்கப்படவுள்ளனர்.
ஜனாதிபதி இமானுவேல் மெக்ரோன் இதனை அறிவித்துள்ளமை சிறப்பம்சமாகும்.
அதேநேரம், குரோஷிய அணியை வரவேற்பதற்காக விசேட நிகழ்வொன்றும் அந்நாட்டில் ஏற்பாடு செய்யப்பட்டது.
ஒரு மில்லியனுக்கும் அதிகமாக அந்நாட்டு ரசிகர்கள் சுமார் 6 மணித்தியாலங்கள் சாக்ரேவ் விமான நிலையத்தில் குரோஷிய வீரர்களை வாழ்த்துவதற்காக காத்திருந்துள்ளனர்.
உலகக்கிண்ண கால்பந்தாட்டத் தொடரில் ஆற்றல்களை வெளிப்படுத்திய வீரருக்கு பரிசளிக்கப்படும் தங்கக்கிண்ணத்தை குரொஷிய அணித்தலைவர் லூக்கா மெட்ரிக் வெற்றி கொண்டமையும் சிறப்பம்சமாகும்.
தொடரில் 2ஆம் இடத்தைப் பிடித்த குரோஷிய அணிக்கு 28 மில்லியன் அமெரிக்க டொலர் பரிசுத்தொகை வழங்கப்பட்டமையும் குறிப்பிடத்தக்கது.
