திருச்சி விமான நிலையத்திற்கு நேற்று இரவு மலேசியாவில் இருந்து மலிண்டோ விமானம் வந்தது. இந்த விமானத்தில் வந்த பயணிகளை சுங்கத்துறையை சேர்ந்த வான் நுண்ணறிவு பிரிவு அதிகாரிகள் தீவிரமாக கண்காணித்தனர்.
அப்போது சந்தேகத்திற்கு இடமளிக்கும் வகையில் நடந்து வந்த ராமநாதபுரம் மாவட்டம் இளையான்குடியை சேர்ந்த முகமதுரபீக், சென்னையை சேர்ந்த இம்தியாஸ், திருச்சி செந்தண்ணீர்புரத்தை சேர்ந்த விஜயலெட்சுமி ஆகிய 3 பேரையும் பிடித்து அதிகாரிகள் தீவிர விசாரணை நடத்தினர்.
விசாரணையின் போது முன்னுக்குப்பின் முரணாக பேசியதால் சந்தேகம் அடைந்த அதிகாரிகள் அவர்களை நவீன ஸ்கேனர் கருவி மூலம் சோதனை செய்தனர். அப்போது உடலுக்குள் மறைத்து வைத்து 3 பேரும் சேர்ந்து 650 கிராம் தங்கத்தை கடத்தி வந்தது தெரியவந்தது.
இதையடுத்து அந்த தங்கத்தை பறிமுதல் செய்த அதிகாரிகள் அவர்கள் 3 பேரிடமும் தீவிர விசாரணை நடத்தி வருகிறார்கள். அதிகாரிகளால் பறிமுதல் செய்யப்பட்ட இந்த தங்கத்தின் மதிப்பு ரூ.17.5 லட்சம் என்று தெரிவிக்கப்பட்டுள்ளது.
