மகிந்த அணியுடன் இணைந்து ஆட்சி அமைக்க ஈ.பி.ஆர்.எல்.எவ். கட்சியின் எடுத்த நடவடிக்கையை மக்கள் ஒருபோதும் ஏற்றுக் கொள்ளவோ – மன்னிக்கவோ மாட்டார்கள் என தமிழ்த் தேசியக் கூட்டமைப்பின் நாடாளுமன்ற உறுப்பினர் செல்வம் அடைக்கலநாதன் தெரிவித்துள்ளார்.
வவுனியா வடக்குப் பிரதேச சபையின் தவிசாளர், உபதவிசாளர் தெரிவு முடிவடைந்த பின்னர் செய்தியாளருக்கு கருத்துத் தெரிவித்தபோதே அவர் மேற்கண்டவாறு தெரிவித்தார் .
நாங்கள் மக்களால் ஏற்றுக் கொள்ளப்பட்டு கூடுதலான ஆசனங்களைப் பெற்றிருந்தோம். இருப்பினும் அதிஷ்டத்தின் மூலம் இன்று நீதி வென்றிருக்கின்றது. இந்த வன்னி மண்ணிலே எங்களை அழித்து ஒழித்து நிர்கதியாக்கிய மகிந்தவின் கட்சியோடு இணைந்து ஆட்சியமைக்க ஆதரவு கேட்ட செயற்பாட்டை தமிழ் மக்கள் ஒருபோதும் மன்னிக்க மாட்டார்கள்.
யாழ்ப்பாணத்தில் நாங்கள் ஈ.பி.டி.பியுடன் இணைந்து ஆட்சியமைக்கவில்லை. என்றும் அவர்கள் ஒவ்வொருவரும் சுயமாகவே செயற்பட்டார்கள். அது அவர்களுடைய சொந்த விருப்பம்.
வவுனியா நகர சபையில் தவிசாளராக தமிழர் தெரிவு செய்யப்பட்டுள்ளார். அவருக்கு வாழ்த்துக்களைக் கூறிக் கொள்கின்றேன் – என்றார்.
இதேவேளை சாவகச்சேரி நகர சபைக்கான தேர்தலில் கஜேந்திரகுமார் பொன்னம்பலம் தலைமையிலான தமிழ் தேசிய மக்கள் முன்னணி அதிக ஆசனங்களை கைப்பற்றியிருந்த நிலையிலேயே தமிழ்த் தேசியக் கூட்டமைப்பு மகிந்தவின் பங்காளிக் கட்சியான டக்ளசின் ஈபிடிபியின் ஆதரவை பெற்றே சாவகச்சேரி நகரசபையில் ஆட்சி அமைத்துள்ளமை குறிப்பிடத் தக்கது .
