நம்பிக்கையில்லாப் பிரேரணை குறித்த விவாதத்திற்கு முன்னர் ரணில் தனது பதவியினை துறக்க வேண்டும். இல்லையேல் நான்காம் திகதி இரவு 9 மணியுடன் தேசிய அரசாங்கத்திற்கு முற்றுப்புள்ளி வைக்கப்படும் என சிறீலங்கா சுதந்திரக் கட்சி திட்டவட்டமாக அறிவித்தது.
நல்லாட்சியை காப்பாற்ற வேண்டுமா அல்லது தனது பதவியை காப்பாற்ற வேண்டுமா என்பதை பிரதமர் தீர்மானிக்க வேண்டும், அதற்கு இரண்டு நாட்கள் காலக்கெடு கொடுப்பதாகவும் சிறீலங்காசுதந்திரக் கட்சியினர் தெரிவித்துள்ளனர்..
சிறீலங்கா சுதந்திர கட்சியின் செய்தியாளர் சந்திப்பு நேற்று (30) கட்சி தலைமை அலுவலகத்தில் இடம்பெற்றது. இதில் கலந்துகொண்டு கருத்து தெரிவிக்கும் போதே கட்சியின் உறுப்பினர்கள் இவ்வாறு குறிப்பிட்டனர்.
பிரதமர் ரணில் விக்கிரமசிங்கவிற்கு எதிராக கொண்டுவரப்பட்டுள்ள நம்பிக்கையில்லா பிரேரணையானது நியாயமான அடிப்படை நிலைப்பாடுகளை கொண்ட காரணிகளை உள்ளடக்கியே முன்வைக்கப்படுகின்றது. பாராளுமன்றத்தின் கட்சி நிலைப்பாடுகளை அவதானித்தால், பொதுத் தேர்தலின் போது ஐக்கிய தேசிய முன்னணி 106 ஆசனங்களை பெற்றுக்கொண்டது. இதில் ஐக்கிய தேசியக் கட்சிக்கு 82 ஆசனங்கள் உள்ளன. ஏனையவை கூட்டுக் கட்சிகளின் ஆசனங்களாகும்.
ஐக்கிய மக்கள் சுதந்திர முன்னணியின் 95 ஆசனங்களில் ஸ்ரீலங்கா சுதந்திர கட்சிக்கு 82 ஆசனங்களும் கூட்டணி கட்சிகளுக்கு ஏனைய ஆசனங்களும் உள்ளன. ஆகவே பாரளுமன்றத்தில் தனிக் கட்சி அங்கீகாரம் என்று பார்க்கையில் சிறீலங்கா சுதந்திர கட்சிக்கும், ஐக்கிய தேசியக் கட்சிக்கும் இடையில் ஆசன எண்ணிக்கை சமமாகவே உள்ளன . சிறீலங்கா சுதந்திர கட்சி ஆளும் தரப்பிலும் எதிர்த்தரப்பிலும் இருந்து செயற்பட்டு வருகின்றது. இதனைத் தவிர்த்து தமிழ் தேசியக் கூட்டமைப்பு மற்றும் ஜே.வி.பி ஆகிய கட்சிகளும் அடுத்த இடங்களில் உள்ளன. இதனை கொண்டே நான்காம் திகதி வாக்கெடுப்பிலும் தீர்மானங்கள் அமையப்போகின்றன.
ஐக்கிய தேசியக் கட்சியின் செயற்குழுக் கூட்ட தீர்மானம் ஊடாக நம்பிக்கையில்லா பிரேரணையை தோற்கடிக்க முடியாது. இந்நிலையில் சிறீலங்கா சுதந்திர கட்சியின் தீர்மானம் என்னவென்பது குறித்து கேள்வி எழுகின்றது. மத்திய வங்கி ஊழல் விவகாரம் குறித்து சிறீலங்கா சுதந்திர கட்சியின் கோரிக்கைகளை உள்ளடக்கிய வகையிலே நம்பிக்கையில்லா பிரேரணை கொண்டுவரப்பட்டுள்ளது. சிறீலங்கா சுதந்திர கட்சியின் மத்திய குழுக் கூட்டத்தில் 9 பேர் கொண்ட குழு அமைக்கப்பட்டு இந்தக் குழு 15 காரணிகளை முன்வைத்தது.
அதற்கமையவே ஜனாதிபதி ஆணைக்குழு அமைக்கப்பட்டது. இதனைக் கொண்டே இப்போது நம்பிக்கையில்லா பிரேரணை வரையில் வந்துள்ளது. நம்பிக்கையில்லா பிரேரணையில் உள்ளடக்கப்பட்டுள்ள காரணிகளில் 13 காரணிகள் சிறீலங்கா சுதந்திர கட்சி சுட்டிக்காட்டிய விடயமாகும். ஆகவே ஒருபோதும் எம்மால் நம்பிக்கையில்லா பிரேரணையை எதிர்க்க முடியாது.
நம்பிக்கையில்லா பிரேரணையில் அரசாங்கம் தோற்றால் ஜனாதிபதியும் இல்லை, பிரதமரும் இல்லை சபாநாயகரே பொறுப்புக்களை கையாள வேண்டும் என சிலர் கூறுகின்றனர். இவர்களின் கருத்துக்கள் எந்தவித அடிப்படையும் இல்லாதவையாகும். அரசியல் அமைப்பு என்னவென்பது தெரியாத நபர்களாலேயே இவ்வாறான கருத்துக்களை முன்வைக்க முடியும். அரசியல் அமைப்பின் 46 ஆம் அத்தியாயம் இரண்டாம் சரத்தில் இந்த விடயங்கள் தெளிவாக கூறப்பட்டுள்ளன. ஜனாதிபதிக்கு எதிராக நம்பிக்கையில்லா பிரேரணை ஒன்றை கொண்டுவர முடியாது. அமைச்சரவை பிரதானி என்ற வகையில் அவரை நீக்கிவிட்டு அரசாங்கத்தை எவ்வாறு கொண்டுசெல்ல முடியும்.? ஆகவே யதார்த்தமாக நடைபெறும் காரியங்களை மாத்திரமே நாம் பேச வேண்டும்.
மேலும் இப்போது நம்பிக்கையில்லா பிரேரணை குறித்த கட்சிகளின் நிலைமைகளை கருத்தில் கொண்டால் நம்பிக்கையில்லா பிரேரணையை முன்வைத்துள்ள ஸ்ரீலங்கா பொதுஜன முன்னணிக்கு 44.6 வீத வாக்குகள் கிடைக்கப்பெற்றன. ஐக்கிய தேசியக் கட்சிக்கு 32.5 வீத வாக்குகள், ஐக்கிய மக்கள் சுதந்திர முன்னணிக்கு 9.8 வீத வாக்குகளும் ஸ்ரீலங்கா சுதந்திர கட்சிக்கு 3.6 வீத வாக்குக்களுமாக மொத்தமாக 14.2 வீத வாக்குகளும், ஜே.வி.பி க்கு 6 வீத வாக்குகளும், தமிழ் தேசியக் கூட்டமைப்பிற்கு 3 வீத வாக்குகளும் கடந்த உள்ளூராட்சி மன்றத் தேர்தலில் கிடைக்கப்பெற்றுள்ளன.
இதில் சிறீலங்கா பொதுஜன முன்னணியின் பிரேரணையை ஜே.வி.பி ஆதரிப்பதாக கூறியுள்ள நிலையில் மொத்தமாக 51 வீத மக்கள் ஆதரவும் ஸ்ரீலங்கா சுதந்திர கட்சி இணைந்தால் மொத்தமாக 65 வீதமான வாக்குகள் பிரதமரை எதிர்க்கும் அணியில் உள்ளன. ஆகவே இவற்றையெல்லாம் கருத்தில் கொண்டு பிரதமர் உடனடியாக தீர்மானம் எடுக்க வேண்டும் எனக் குறிப்பிட்டார்.
