கொடிகாமம் தவசிக்குளம் பகுதியில் மணல் கடத்தலில் ஈடுபட்ட உழவு இயந்திரம் மோதியதில் குடும்பஸ்தர் ஒருவர் தலை நசுங்கி சம்பவ இடத்திலேயே பலியாகியுள்ளார்.
இப்பரிதாபச் சம்பவம் நேற்று திங்கட்கிழமை இரவு 7.30 மணியளவில் கொடிகாமம் தவசிகுளம் பகுதியில் இடம்பெற்றுள்ளது.
தவசிகுளம் பகுதியில் உள்ள வீடொன்றிற்கு திருட்டு மணலை இறக்கிவிட்டு மிக வேகமாக சென்று கொண்டிருந்த உழவு இயந்திரம் துவிச்சக்கர வண்டியில் சென்று கொண்டிருந்த குடும்பஸ்தரை மோதிவிட்டு தப்பிச்சென்றுள்ளது.
உழவு இயந்திரங்களின் சக்கரங்கள் தலைமேல் ஏறியதில் குறித்த குடும்பஸ்தர் தலைநசுங்கி சம்பவ இடத்திலேயே பலியாகியுள்ளார்.
நாவலடி கொடிகாமத்தைச் சேர்ந்த 36 வயதான சிவஞானம் சுரேஸ்குமார் என்ற குடும்பஸ்தரே பரிதாபமாக பலியாகியுள்ளார். விபத்தையடுத்து துரிதமாக செயற்பட்ட கொடி காமம் பொலிஸார் தப்பிச்சென்ற உழவு இயந்திரத்தின் சாரதியை கைது செய்துள்ளனர்.
சம்பவ இடத்திற்கு விரைந்த சாவகச்சேரி நீதிவானின் விசாரணைகளைத் தொடர்ந்து சடலம் சாவகச்சேரி வைத்தியசாலையில் ஒப்படைக்கப்பட்டுள்ளது.
குறித்த பகுதிகளில் தொடர்ச்சியாக மணல் கடத்தலில் ஈடுபடுபவர்கள் வாகன விளக்குகளை அணைத்துவிட்டு மிக வேகமாக ஆபத்தான முறையில் பயணிப்ப தாகவும் அப்பகுதி மக்கள் தெரிவித்துள்ளனர்.
