வவுனியா, பூவரசங்குளம் ஆரம்பப் பாடசாலை காணியை அதிரடிப்படையினர் சுவீகரித்துள்ளமையால் மாணவர்கள் பாதிப்படைந்துள்ளதாக வன்னி மாவட்ட பாராளுமன்ற உறுப்பினர் சிவசக்தி ஆனந்தன் தெரிவித்தார்.
இது குறித்து அவர் ஊடகங்களுக்கு தெரிவித்துள்ளதாவது,
யுத்தம் நடைபெற்று முடிந்ததன் பின்னர் அதாவது 2010ஆம் ஆண்டில் வவுனியா பூவரசங்குளம் பிரதேசத்தில் அமைந்துள்ள பூவரசு ஆரம்பப் பாடசாலையில் விசேட அதிரடிப்படையினர் முகாமிட்டு பாடசாலையின் கற்றல் கற்பித்தல் நடவடிக்கைக்கு இடையூறு ஏற்படுத்திவருவதுடன் பாடசாலையின் அபிவிருத்தி நடவடிக்கைகளுக்கும் தடையாக உள்ளனர்.
கொழும்பில் உள்ள உயர் பாதுகாப்பு வலயங்களில் உள்ள தனியார் காணிகளில் உள்ள பாதுகாப்புத் தரப்பினர் அப்புறப்படுத்தப்பட்டு அந்தக்காணிகளை உரியவர்களிடம் கொடுப்பதற்கு புதிய அரசாங்கம் நடவடிக்கைகளை மேற்கொண்டுள்ளது. ஆனால், யுத்தத்தினால் உண்மையில் பாதிக்கப்பட்ட பிரதேச மக்களின் வாழ்வியலோடு ஒன்றிய பாடசாலையிலிருந்து விசேட அதிரடிப்படையினரை வெளியேற்றுவதற்கு இன்னமும் அரசாங்கத்திற்கு மனம் வராமலிருப்பது கவலையளிப்பதாக உள்ளது.
முந்தைய அரசாங்கம் காது கொடுத்துக் கேளாதிருந்த எமது கோரிக்கைகளை புதிய அரசாங்கம் செவிமடுக்கும் என்ற எதிர்பார்ப்பில் இந்த வேண்டுகோளை விடுப்பதாக தெரிவித்தார்.
மேலும், இது தொடர்பாக காவல்துறை, அனர்த்த முகாமைத்துவம் மற்றும் கிறிஸ்தவ விவகார அமைச்சருக்கும் பாதுகாப்புச் செயலாளருக்கும் கடிதம் எழுதியிருப்பதாகவும் தெரிவித்துள்ளார்.
வவுனியா தெற்கு கல்வி வலயத்தில் அமைந்துள்ள பூவரசங்குளத்திலுள்ள பூவரசு ஆரம்பப் பாடசாலையில் 2010 ஆம் ஆண்டிலிருந்து விசேட அதிரடிப்படையினர் முகாமிட்டுள்ளனர். இரண்டு ஏக்கர் விஸ்தீரணமுள்ள மேற்படி பாடசாலைக்காணி, கட்டடம், கிணறு, மலசலகூடம் என்பவற்றையும் இவர்களே தமது பயன்பாட்டில் வைத்துள்ளனர்.
125க்கும் மேற்பட்ட மாணவர்களைக் கொண்ட மேற்படி ஆரம்பப் பாடசாலை தற்போது அருகிலுள்ள பூவரசங்குளம் மகா வித்தியாலய கட்டடத்தில் தற்காலிகமாக இயங்கிவருகின்றது. இதனால்,ஆரம்ப பாடசாலையின் கல்வி அபிவிருத்தி, வள அபிவிருத்தி உட்பட பல்வேறு விடயங்களை செயல்படுத்துவதில் முட்டுக்கட்டை நிலை ஏற்பட்டுள்ளது.
கடந்த வருடத்தில் இப்பாடசாலைக்கென ‘Room to Read’ நிறுவனத்தால் ஒதுக்கீடு செய்யப்பட்ட நிதியானது பாடசாலைச் சமூகத்தின் பொறுப்பில் பாடசாலைக்கான காணியும் நிரந்தரக் கட்டடமும் இல்லாமையால் மீளப்பெறப்பட்டுள்ளது. இவ்வாண்டு UNICEF, Educational Ministry என்பவற்றால் இரு கட்டடங்கள் ஒதுக்கீடு செய்யப்பட்டுள்ளன. பாடசாலைச் சூழலிலிருந்து அதிரடிப்படையினர் விரைவில் வெளியேற்றப்படாவிட்டால் மீண்டும் இவ்விரு கட்டடங்களும் கட்ட முடியாத நிலை ஏற்படக்கூடும் என மேற்படி பாடசாலைச் சமூகம் அச்சம் கொண்டுள்ளது.
இப்பாடசாலை காணியிலிருந்து அதிரடிப்படையினரை வெளியேறுமாறு 2013 நவம்பர் மாதத்தில் நடந்த வடக்கு மாகாண சபையின் முதலாவது அமர்வில் தீர்மானம் நிறைவேற்றப்பட்டது. வவுனியா மாவட்ட அரசாங்க அதிபரும் 2014 ஆம் ஆண்டின் இறுதியில் இரண்டு தடவை இராணுவத்தை காணியிலிருந்து வெளியேறுமாறு பணித்திருந்தார். வவுனியா மாவட்ட அபிவிருத்திக் குழுக் கூட்டத்திலும் தீர்மானம் நிறைவேற்றப்பட்டிருந்தது.
இவ்வாறு பல்வேறு கோரிக்கைகள் உத்தரவுகள் விடுக்கப்பட்ட போதிலும் விசேட அதிரடிப்படையினர் காணியிலிருந்து இதுவரை வெளியேறவில்லை. தற்போதைய புதிய அரசாங்கம் தனியார் காணிகளிலிருந்து இராணுவத்தை வெளியேற்றுவதாகக் கூறுகின்ற நிலையில் பாடசாலைக்காணி, கட்டடத்திலிருந்து விசேட அதிரடிப்படையினர் வெளியேற மறுப்பது கண்டனத்திற்குரியது.
எனவே உடனடியாக விசேட அதிரடிப் படையினரை வெளியேற்றி வந்த நிதி திரும்பிப்போகாமல் நிரந்தரக்கட்டடம் அமைக்க வழிவகுப்பதுடன் பின்தங்கிய கிராமப்புறச் சிறார்களின் கல்வி வளர்ச்சிக் கும் உதவுமாறு பாடசாலைச் சமூகம் என்னிடம் வேண்டுகோள் விடுத்துள்ளது.
எனவே, பாதிக்கப்பட்ட மக்களின் பிள்ளைகள் தமது கற்றல் நடவடிக்கைகளை தமது சொந்தப் பாடசாலையில் தடையின்றி மேற்கொள்ள புதிய அரசு காலதாமதமின்றி உடன் மேற்கொள்ள வேண்டுமென்று கேட்டுக்கொள்வதாக சிவசக்தி ஆனந்தன் எம்.பி. தெரிவித்தார்.
