யாழ்ப்பாணம் கொக்குவில் பகுதியில் முறைப்பாடு ஒன்று தொடர்பாக விசாரணை நடத்துவதற்கு சென்ற பொலிஸ் உத்தியோ கத்தர்கள் இருவர் மீது மோட்டார் சைக்கிள்களில் வந்த இனந்தெரியாத கும்பலொன்று துரத்தி துரத்தி வாள்வெட்டுத் தாக்குதல்களை மேற்கொண்டுள்ளது.
வாள்வெட்டுத் தாக்குதலில் படுகாயமடைந்த நிலையில் பொலிஸ் உத்தியோகத்தர்கள் இருவரும் யாழ்.போதனா வைத்தியசாலையில் சிகிச்சைக்காக அனுமதிக்கப்பட்டுள்ளார்கள்.
இந்த சம்பவமானது நேற்று ஞாயிற்றுக்கிழமை நண்பகல் 12 மணியளவில் கொக்குவில் நந்தாவில் அம்மன் கோவில் வீதியில் இடம்பெற்றுள்ளது. கோப்பாய் பொலிஸ் நிலையத்தை சேர்ந்த பொலிஸ் காண்ஸ்டபிள் சுரேன் மற்றும் பொலிஸ் காண்ஸ்டபிள் ரட்ணாயக்க தம்மிக்க ஆகிய இரு பொலிஸ் உத்தியோகத்தர்களுமே வாள்வெட்டுத் தாக்குதலுக்கு இலக்காகி காயமடைந்துள்ளனர்.
நேற்று நண்பகல் குறித்த இரண்டு பொலிஸ் உத்தியோகத்தர்களும் கோப்பாய் பொலிஸ் நிலையத்தில் இருந்து பொலிஸ் நிலையத்தில் மேற்கொள்ளப்பட்ட முறைப்பாடு தொடர்பில் விசாரணை செய்வதற்காக கொக்குவில் பகுதிக்கு மோட்டார் சைக்கிளில் சென்றுள்ளனர். இதன்போது கொக்குவில் நந்தாவில் பகுதியில் உள்ள வெற்று பற்றைக்காட்டு பகுதியில் சிலர் மது அருந்தி குழப்பத்தில் ஈடுபடுகின்றார்கள் என குறித்த பொலிஸ் உத்தியோகத்தர்களுக்கு அப் பகுதியை சேர்ந்தவர்கள் கூறியுள்ளனர்.
இதனையடுத்து அப் பகுதிக்கு சென்ற இரு பொலிஸ் உத்தியோகத்தர்களும் அங்கு சில இளைஞர்கள் மது அருந்திகொண்டிருப்பதையும் அவர்களிடம் வாள் போன்ற ஆயுதங்கள் இருப்பதனையும் அவதானித்ததுடன் இருவரும் அங்கிருந்து திரும்பி பொலிஸ் நிலையம் நோக்கி சென்றுள்ளார்கள்.
இச்சமயத்திலேயே குறித்த பொலிஸ் உத்தியோகத்தர்களை மோட்டார் சைக்கிளில் பின் தொடர்ந்து வந்த கும்பலொன்று அவர்கள் மீது வாள்வெட்டுத் தாக்குதலை நடாத்தியுள்ளது.
மூன்று மோட்டார் சைக்கிள்களில் மூகங்களை மூடிக் கொண்டுவந்த பத்துக்கும் மேற்பட்ட இனந்தெரியாத குழுவொன்று இவர்களை துரத்தி துரத்தி வாள்வெட்டுத் தாக்குதலை மேற்கொண்டுவிட்டு அங்கிருந்து தப்பிச் சென்றுள்ளது. இதனையடுத்து படுகாயமடைந்த இரண்டு பொலிஸ் உத்தியோகத்தர்களும் யாழ்.போதனா வைத்தியசாலையில் சிகிச்சைக்காக அனுமதிக்கப்பட்டுள்ளார்கள். இரு பொலிஸ் உத்தியோகத்தரில் ஒருவருக்கே கை, கால், துடை பகுதிகளில் பலமான காயம் ஏற்பட்டுள்ளதாக வைத்தியசாலை தகவல்கள் தெரிவிக்கின்றன.
இதேவேளை இச்சம்பவத்தையடுத்து அப் பகுதியில் பொலிஸாரும் விஷேட அதிரடிப்படையினரும் வருவிக்கப்பட்டு பாதுகாப்பு நடவடிக்கைகள் மேற்கொள்ளப்பட்டதுடன் பொலிஸ் தடயவியல் பிரிவு பொலிஸாரும் சம்பவ இடத்திற்கு சென்று விசாரணை நடவடிக்கைகளை ஆரம்பித்திருந்தனர். குறிப்பாக சம்பவ இடத்திற்கு சென்ற யாழ்.சிரேஸ்ட பொலிஸ் அத்தியட்சகர் ஸ்ரேனிஸ்லஸ் சம்பவம் தொடர்பான ஆரம்பகட்ட விசாரனைகளை மேற்கொள்வது தொடர்பாக பொலிஸாருக்கு அறிவுறுத்தல்களை வழங்கியிருந்தார்.
இந்நிலையில் இவ் வாள்வெட்டு மற்றும் அதன் தொடர்ச்சியாக அப் பகுதியில் விஷேட அதிரடிப் படையினரும், ஆயுதம் தாங்கிய பொலிஸாரும் வருவிக்கப்பட்டிருந்தமையால் அப் பகுதியில் பதட்டமான ஒர் சூழல் நிலவியிருந்தது. இதேவேளை நேற்றுக் காலையும் அப் பகுதியூடாக சிலர் வாள்களுடன் நடமாடியிருந்ததாக அப் பகுதி மக்கள் தெரிவித்திருந்தமையும் குறிப்பிடத்தக்கதாகும்.
