‘தமிழகத்தில் “முகமூடி முதல்வர்” ஒருவர் தலைமையில் “ரிமோட் கண்ட்ரோல்” ஆட்சி நடைபெற்று வருவதாக அல்லவா அனைவரும் பேசிக் கொள்கிறார்கள்’ என்று தி.மு.க. தலைவர் கருணாநிதி பரிகாசம் செய்துள்ளார்.
இது தொடர்பாக அவர் வெளியிட்டுள்ள அறிக்கையில்,
“ஓ.பன்னீர்செல்வம் முதலமைச்சராகப் பொறுப்பேற்று 125 நாட்களுக்கு மேலான பிறகு, இப்போதுதான் கன்னி முயற்சியாக அவர் தலைமையில் முதல் அமைச்சரவைக் கூட்டம் நடைபெறுகிறது.
கடந்த ஆண்டு செப்டெம்பர் 29இல் பன்னீர்செல்வம் முதல்வராகப் பொறுப்பேற்று நான்கு மாதங்கள் முடிவடைந்த பிறகு, முதலாவது அமைச்சரவைக் கூட்டத்தை நடத்துகிறார். இதற்குக் கூட முதலமைச்சர், ஜெயலலிதாவைச் சந்தித்து ஒப்புதல் பெற்ற பிறகுதான் அமைச்சரவைக் கூட்டத்தைக் கூட்டுவதாக செய்தி வந்துள்ளது.
அ.தி.மு.க. ஆட்சி எவ்வாறு செயல்படுகிறது என்பதற்கு இது ஒன்றே உதாரணம். அதுவும்கூட விரைவில் சட்டப்பேரவைக் கூட்டம் தொடங்க வேண்டிய நிலையில் அமைச்சரவையைக் கூட்டி விவாதிக்க வேண்டும் என்ற கட்டாயத்தின் பேரில் கூட்டுகிறார்களாம்.
தமிழகத்தில் “முகமூடி முதல்வர்” ஒருவர் தலைமையில் “ரிமோட் கண்ட்ரோல்” ஆட்சி நடைபெற்று வருவதாக அல்லவா அனைவரும் பேசிக் கொள்கிறார்கள்!” என்று குறிப்பிட்டுள்ளார்.
