யாழ்ப்பாணத்தில் இருந்து கட்டுநாயக்க விமான நிலையம் சென்று கொண்டிருந்த வான் மீது புத்தளம் கருவலகஸ்வெவ பிரதேசத்தில் நேற்று அதிகாலை காட்டுயானை தாக்கியதில் சிறுவன் உட்பட இருவர் உயிரிழந்துள்ளனர். மேலும் ஒன்பது பேர் காயமடைந்துள்ளனர்.யாழிலிருந்து கனடா செல்வதற்காக கொழும்பு கட்டுநாயக்க விமான நிலையம் நோக்கி ஹயஸ் வானில் பயணித்தவர்கள் மீது நேற்று அதிகாலை 2.20 மணியளவில் காட்டு யானை தாக்குதல் நடத்தியது.
இதனால் வானில் இருந்த 39 வயதுடைய நபர் ஒருவர் ஸ்தலத்திலேயே உயிரிழந்துள்ளதுடன் மேலும் 10 பேர் காயமடைந்து வைத்தியசாலையில் அனுமதிக்கப்பட்டனர்.
இவ்வாறு கொழும்பு தேசிய வைத்தியசாலையில் அனுமதிக்கப்பட்டிருந்த 05 வயது சிறுவன் ஒருவன் சிகிச்சைப்பலனின்றி நேற்று மதியம் உயிரிழந்துள்ளான்.
காட்டுயானையின் மூர்க்கத்தனமான தாக்குததால் வாகனத்தின் உடற்பகுதிகள் பலத்த சேதமடைந்து காணப்படுவதுடன், காயமடைந்தவர்களில் இருவர் ஆபத்தான நிலையில் சிகிச்சை பெற்று வருவதாகவும் அறியக்கிடைத்துள்ளது.
