புங்குடுதீவு பாடசாலை மாணவியான வித்தியா தொடர்பான வழக்கு விசாரணையில் இதுவரை மேற்கொள்ளப்பட்ட சகல விசாரணை அறிக்கைகளையும் சட்டமா அதிபர் திணைக்களத்திடம் சமர்ப் பித்துள்ளதாக குற்றப்புலனாய்வு அதிகாரி மன்றில் தெரிவித்திருந்தார்.
இதேவேளை குறித்த வழக்கை மேல் நீதிமன்றத்துக்கு மாற்றுவதற்கான நடவடிக்கையை சட்டமாதிபர் திணைக்களம் மேற்கொள்ளும் என ஊர்காவற்றுறை நீதிவான் நீதிமன்ற நீதிவான் வை.எம்.எம்.றியால் தெரிவித்துள்ளார்.
குறித்த மாணவி படுகொலை செய்யப்பட்டமை தொடர்பான வழக்கு விசாரணைகள் ஊர்காவற்றுறை நீதிவான் நீதிமன்றில் இடம்பெற்றுவருகின்ற நிலையில் அது தொடர்பான வழக்கு விசாரணை நேற்றைய தினம் விசாரணைக்காக எடுத்துகொள்ளப்பட்டபோதே மேற்கண்டவாறு குறிப்பிடப்பட்டது.
வழக்கு விசாரணையின் போது மன்றில் முன்னிலையாகியிருந்த குற்றப்புலனாய்வு பொலிஸ் அதிகாரி, படுகொலை செய்யப்பட்ட குறித்த மாணவி தொடர்பாக இதுவரை மேற்கொண்டிருந்த விசாரணைகள் தொடர்பாக அனைத்து அறிக்கைகளையும் சட்டமா அதிபர் திணைக்களத்திடம் ஒப்படைத்துள்ளதாக தெரிவித்திருந்தார்.
இதேவேளை, குறித்த கொலைவழக்கில் குற்றஞ்சாட்டப்பட்டவர்களின் வாக்குமூல அறிக்கை நீதிமன்ற பாதுகாப்பில் வைக்கப்பட்டிருந்த நிலையில் அதனை ஆராய்வதற்கு வழங்குமாறு குற்றப் பிரிவு அதிகாரிகள் நீதிவானிடம் கோரிக்கை முன்வைத்திருந்தனர். இதன்போது குறித்த வாக்குமூல ஆவணங்கள் சட்டமா அதிபரிடமிருந்து கோரப்படுகின்ற போதே அதனை வழங்க முடியும் என தெரிவித்து குற்றப்புலனாய்வு அதிகாரியின் கோரிக்கையை நீதிவான் நிராகரித்திருந்தார்.
மேலும் குறித்த வழக்கு தொடர்பாக குற்றப்புலனாய்வு அதிகாரியினால் மன்றில் சமர்ப்பிக்கப்பட்டிருந்த மரபணு அறிக்கையில் குறிப்பிட்டுள்ள விடயங்கள் தொடர்பாக சந்தேக நபர்கள் சிலர் மன்றில் கோரிக்கை முன்வைத்தனர். இதன்போது, குறித்த மரபணு அறிக்கை தொடர்பில் தெரிவிக்க வேண்டிய நேரத்தில் தெரிவிக்க வேண்டிய இடத்தில் தெரிவிக்கப்படும். எனவே அது தொடர்பில் தற்போது எதுவும் தெரிவிக்க முடியாது என நீதிவான் தெரிவித்திருந்தார்.
இதேவேளை, வித்தியாவின் குடும்பத்தின் பதிவு காணப்பட்ட புங்குடுதீவு தென்கிழக்கு ஜே–24 கிராமத்தின் கிராம சேவகர் மன்றில் முன்னிலையாகி குறித்த பகுதியிலுள்ள குடும்பங்களின் விபரங்களை தரவுகளாக சமர்ப்பித்திருந்தார். இதன்படி வித்தியாவின் படுகொலை இடம்பெறுவதற்கு முன்னர் 30 குடும்பங்கள் அப்பகுதியில் வசித்து வந்திருந்த நிலையில் அச் சம்பவத்தின் பின்னர் 31குடும்பங்கள் வசித்துவருவதாக அத்தரவில் குறிப்பிடப்பட்டுள்ளது. மேலும் படுகொலைச் சம்பவம் இடம்பெற்றதன் பிற்பாடான காலப்பகுதியில் இரு குடும்பங்கள் வெளியேறியுள்ள போதும் அவர்களின் பதிவுகள் குறித்த கிராம சேவகர் பிரிவில் தொடர்ந்து காணப்படுவதாக கிராம சேவகர் அறிக்கையில் குறிப்பிட்டி ருந்தார்.
இதனையடுத்து குறித்த வழக்கு விசாரணை எதிர்வரும் 26ஆம் திகதிவரை ஒத்திவைக்கப்பட்டுள்ளதாகவும் அது வரை சந்தேகநபர்களை விளக்கமறிய லில் வைக்குமாறும் நீதிவான் உத்தரவிட்டுள் ளமை குறிப்பிடத்தக்கது.
