தமிழ் மக்களின் உரிமைகள் விவகாரங்களை சிங்கள அரசியல் தலைவர்கள் இனவாதக் கண்கொண்டு நோக்கக் கூடாது. தமிழக முதல்வருடனான தொடர்புகளுக்கு மத்தியரசின் அனுமதி தேவையில்லை. ஆகவே காலத்தின் தேவைக்கு ஏற்ப தமிழக முதல்வர் ஜெயலலி
தாவை சந்திப்பேன் என வட மாகா ண முதலமைச்சர் சி.வி.விக்னேஷ்வரன் தெரிவித்தார்.
தமிழ் மக்களின் அபிலாஷைகளை அறிந்துகொண்டு அதற்கேற்ப அரசியலமைப்பு தீர்வு திட்ட யோசனையை வடமாகாண சபை முன்வைத்துள்ளது. ஆனால், தமிழ்த் தேசியக்
கூட்டமைப்பு இந்த விடயத்தில் முன்னின்று செயற்படாமை வேதனையளிப்பதாகவுள்ளது என்றும் குறிப்பிட்டார்.
தமிழக முதல்வருடனான சந்திப்பு மற்றும் உத்தேச அரசியலமைப்பு விவகாரங்கள் குறித்து தெளிவுபடுத்துகையிலேயே வட மாகாண முதலமைச்சர் சி.வி.விக்னேஷ்வரன் மேற்கண்டவாறு குறிப்பிட்டார். அவர் தொடர்ந்தும் கூறுகையில்,
தமிழக முதல்வர் ஜெயலலிதாவுடனான சந்திப்பு தொடர்பில் தென்னிலங்கையில் பல்வேறு இனவாத பிரசாரங்கள் முன்னெடுக்கப்படுகின்றன. ஆனால் அவ்வாறான சந்திப்பு குறித்து இது வரையில் உறுதியான தீர்மானம் எடுக்கப்பட வில்லை. ஆகவே நாங்கள் இனவாதத்தை பரப்புவதாக கூறும் தென்னிலங்கை அரசியல் தலைவர்கள் உண்மையை அறிந்து கொள்ள வேண்டும். தமிழ் மக்களின் உரிமைகள் உரிய வகையில் வழங்கப்பட்டிருந்தால் நாங்கள் ஏன் கோஷம் எழுப்ப போகிறோம் ?
தமிழக முதல்வரை சந்திக்க மத்தியரசின் அனுமதியை பெற்றுக் கொள்ள வேண்டிய தேவை கிடையாது . ஏதேனும் ஒப்பந்தங்கள் கைச்சாத்திடும் பட்சத்தில் அதனை அறிவிக்க வேண்டிய தேவை உள்ளதை நாம் அறிவோம். எமது உரிமைகள் குறித்து பேசும் போது அதனை இனவாதமாக சித்தரிப்பது எந்த வகையில் நியாயமாகும் ? என்பதை புரிந்து கொள்ள வேண்டும். ஒரு இலட்சத்திற்கும் அதிகமான இராணுவம் வடக்கில் நிலை கொண்டுள்ளது. இராணுவத்தினரின் குடும்பங்களுக்கு வடக்கில் வீடுகள் அமைத்துக் கொடுக்கப்பட்டுள்ளது. இன்றும் சிங்கள குடியேற்றங்கள் அசாதாரண முறையில் வடக்கில் முன்னெடுக்கப்படுகின்றன.
ஆனால், உண்மையாக பாதிக்கப்பட்ட தமிழ் மக்களின் காணிகளை விடுவிப்பதில் பல்வேறு நெருக்கடிகள் காணப்படுகின்றன. இராணுவ முகாம்களுக்கு அருகில் பாதுகாப்பாக மக்கள் வாழ முடியும் என கருத முடியாது. இவ்வாறான நடைமுறை பிரச்சினைகளைப் பேசும் போது அதனை இனவாதமாக தென்னிலங்கையில் பரப்பப்படுகின்றது. 1958 மற்றும் 83 களில் தென்னிலங்கையில் தமிழ் மக்களுக்கு எதிராக வன்முறைகள் கட்டவிழ்த்து விடப்பட்டன. அப்போது ஏராளமான தமிழர்கள் விரட்டி அடிக்கப்பட்டனர். அவ்வாறு விரட்டியடிக்கப்பட்டவர்களுக்கு மீண்டும் அங்கு செல்ல வாய்ப்புகள் அளிக்கப்பட்டதா ?
எனவே, இனவாதம் என கூறிக்கொண்டு தமிழ் மக்களின் உரிமைகளை மழுங்கடிக்க முற்படுவது ஏற்புடையதல்ல . இதனால் தான் வடமாகாண சபை அரசாங்கத்தின் உத்தேச புதிய அரசியலமைப்பிற்கு தமிழ் மக்களின் அபிலாஷைகளை உள்ளடக்கிய யோசனை திட்டத்தை முன் வைத்துள்ளது. இந்த திட்டத்தினை தமிழ்த் தேசியக் கூட்டமைப்பின் தலைமைத்துவத்திற்கு வழங்கியுள்ளோம். வட மாகாண சபையின் எதிர்க் கட்சித் தலைவர் கூட அந்த திட்டத்தை ஆதரித்துள்ளார். கூட்டமைப்பு செய்ய வேண்டியதை வட மாகாண சபை செய்துள்ளது. இதனை அரசாங்கத்திடம் வலியுறுத்தி நியாயமானதும் கௌரவமானதுமான தீர்வுத் திட்டத்தை பெற்றுக் கொள்ள முயற்சிக்க வேண்டியது அனைவரினதும் பொறுப்பாகும் என அவர் மேலும் குறிப்பிட்டார்.
