ஐ.நா நோக்கிய ஈருருளிப் பயணம் பெல்ஜியதில் ஆரம்பித்தது!

ஐ.நா நோக்கிய மனித நேய ஈருருளிப் பயணம் இன்றைய நாள் ஐரோப்பிய ஒன்றியத்துக்கு முன்பாக கவனயீர்ப்பு போராட்டத்துடன் ஆரம்பமாகியது .  கவனயீர்ப்பு போராட்டத்தில் தமிழீழ உறவுகள் கலந்துகொண்டு “தமிழின அழிப்புக்கு நீதி வேண்டும்”, அனைத்துலக சுயாதீன  விசாரணை வேண்டும்”, “எமக்கு வேண்டும் தமிழீழம் ” , “எமது தலைவர் பிரபாகரன் ” , போன்ற கோசங்களை  எழுப்பியதோடு, மக்களின் அவலங்களை வெளிப்படுத்தும் பதாதைகளையும்  தாங்கியிருந்தனர்.

அதனை தொடர்ந்து தமிழின அழிப்புக்கு அனைத்துலக சுயாதீன விசாரணையை வலியுறுத்தி ஐநா நோக்கிய மனித நேய ஈருருளிப்  பயணம் தணியாத தாகத்துடன் ஆரம்பமானது.  சமநேரத்தில் ஐரோப்பிய ஒன்றியதுடன்  அரசியல் சந்திப்புகளும்   மேற்கொள்ளப்பட்டது. இச் சந்திப்பில் பின்வரும் கோரிக்கைகள்  வலியுறுத்தப்பட்டது. இன்றைய ஈருருளிப் பயணம் 33 KM தூரத்தை கடந்து நிறைவடைந்துள்ளது . நாளைய தினம் அதே இடத்தில் இருந்து லக்சம்புர்க் நாட்டை நோக்கி செல்ல இருக்கின்றது.

1.பல தசாப்தங்களாக,இலங்கைத்தீவில் சிங்கள அரசினால் தொடர்ந்து நடத்தப்படும் தமிழினப்படுகொலையை ஆராய்ந்து, ஐக்கிய நாடுகள் சபையின் செயலாளர் நாயகம் பங் கீ மூன் அவர்களால் நியமிக்கப்பட்ட நிபுணர்குழுவினால் வெளியிடப்பட்ட அறிக்கைக்கு நீதி கிடைக்கும் பொருட்டு அனைத்துலக குமூகம் அனைத்துலக நீதிமன்றில் விசாரணையை நடாத்தி தமிழ்மக்களுகக்கான நீதியைப் பெற்றுக்கொடுக்க வேண்டும்.

2.ஈழத்தமிழ்த் தேசிய இனத்தைச் சேர்ந்தவர்கள் என்ற காரணத்திற்காகத் தடுத்து வைக்கப்பட்டுள்ளவர்களைச் சிறீலங்கா அரசு உடனடியாக விடுதலை செய்வதோடு, தமிழர் தாயகமாகிய இலங்கைத்தீவின் வடக்கு கிழக்குப் பகுதிகளில் தமிழ்மக்கள் சுதந்திரமாக வாழக்கூடிய விதத்தில் அங்கு ஆக்கிரமித்துள்ள சிங்களப் படைகள் முற்றுமுழுதாக வெளியேற்றப்பட்டு தமிழர் நிலப்பறிப்பு உடன் நிறுத்தப்பட்டு இயல்பு வாழ்க்கை உருவாக்கப்படவேண்டும்.

3.இலங்கைத் தீவின் வடக்கு கிழக்குப் பகுதிகளை பாரம்பரிய நிலமாகக் கொண்ட தமிழீழ மக்களின் தாயகம், தேசியம், தன்னாட்சி என்பவற்றை ஐக்கிய நாடுகள் அவை (அனைத்துலகம்) அங்கீகரிக்கவேண்டும்.

4.கருத்து வெளிப்பாட்டு மற்றும் ஊடகச் சுதந்திரம் வழங்கப்பட்டு, தமிழீழ மக்கள் தமது அரசியல் அபிலாசைகளை வெளிப்படுத்தக் கூடிய விதத்தில் ஐக்கிய நாடுகள் அவையின் கண்காணிப்பில் தமிழர் தாயகத்தில் சர்வசன வாக்கெடுப்பு நடத்தப்படவேண்டும். அதேவேளை புலம்பெயர் தமிழீழ மக்களும் வாக்கெடுப்பில் கலந்துகொள்ளக் கூடிய வாய்ப்பையும் ஐக்கிய நாடுகள் அவை ஏற்படுத்திக் கொடுக்கவேண்டும்.

5.மூன்று தசாப்தகாலமாக எமது மக்களையும் எமது மரபுவழித் தாயகத்தையும் பாதுகாத்து, அனைத்துலகச் சட்டங்களை மதித்து, நடைமுறை அரசை நிறுவிய எமது விடுதலை இயக்கமான தமிழீழ விடுதலைப்புலிகள் அமைப்பினால் மட்டுமே தொடர்ந்தும் எமது மக்களையும் எமது நிலத்தையும் பாதுகாக்க முடியும். ஆகவே இவ்வமைப்பை எமது விடுதலை இயக்கமாக அனைத்துலக குமூகம் ஏற்றுக்கொள்ள வேண்டும்.

மனித நேய ஈருருளிப்  பயணம் சென்ற  வழிகளில் வேற்றின மக்களுக்கு தமிழின அழிப்பை எடுத்துரைத்ததோடு துண்டுப்பிரசுரங்களும் வழங்கப்பட்டது.