பிரான்சு டிஸ்னி லான்ட் வளாகத்துக்கு அருகே கைத்துப்பாக்கி நபர் கைது!

ஐரோப்பாவில் உல்லாசப்பயணிகளை பெரிதும் கவரும் இடங்களில் ஒன்றான பிரான்சு டிஸ்னி லான்ட் ( Disneyland ) வளாகத்துக்கு அருகே இரண்டு கைத்துப்பாக்கிகளுடன் நபர் ஒருவரைக் கைது செய்திருப்பதாக பிரான்ஸ் பொலிஸார் தெரிவித்திருக்கின்றனர்.

டிஸ்னி வளாகத்துக்கு வெளியே உள்ள நியுயோர்க் ஹொட்டேலின் பாதுகாப்பு அதிகாரிகள் அங்கு தங்குவதற்காக வருகைதந்த நபர் ஒருவரை சோதனையிட்டசமயம், அவரது பயணப்பொதியில் இரு கைத்துப்பாக்கிகள் மற்றும் வெடி பொருள்கள், குரான் புத்தகம் என்பவற்றைக் கண்டுபிடித்தனர் என்றும்-

உடனடியாக பொலிஸார் அழைக்கப்பட்டு அவர் கைதுசெய்யப்பட்டார் என்றும்-

பாரிஸ் ஊடகங்கள் தகவல் வெளியிட்டிருக்கின்றன.

28 வயதான இந்த நபருடன் காணப்பட்ட பெண் ஒருவரும் கைதுசெய்யப்பட்டிருக்கிறார்

இதேவேளை வெடிகுண்டு மிரட்டல் காரணமாக பாரிஸ் நகரின் முன்னணி உயர் கல்லலூரிகள் சிலவற்றில் நேற்றும் இன்றும் மாணவர்கள் பாதுகாப்புக்கருதி வெளியேற்றப்பட்ட சம்பவங்கள் இடம்பெற்றுள்ளன.

அநாமதேய தகவல்களூடாக விடுக்கப்பட்ட மிரட்டல்களால் கல்லூரிகளில் கண்காணிப்பு தீவிரப்படுத்தப்பட்டுள்ளது.மாணவர்கள் பாடசாலை நேரத்தில் வெளியே சென்று வருவது கட்டுப்படுத்தப்பட்டுள்ளது.

கடந்த நவம்பரில் 130 பேர் கொல்லப்பட்ட பயங்கரவாதத் தாக்குதல்களை அடுத்து அமுல் செய்யப்பட்ட அவசரகாலச்சட்டத்தின் கீழ் பிரான்ஸ் முழுவதும் பலத்த பாதுகாப்பு பேணப்பட்டு வருகிறது.